قازاقستان ۇكىمەتى ەلدەگى بەنزين مەن ديزەل وتىنىنىڭ باعاسىن كورشى ەلدەرمەن تەڭەستىرۋ ءۇشىن بىرتىندەپ وسىرەتىن بولدى. بۇل تۋرالى ۇكىمەتتە وتكەن باسپا ءسوز ءماسليحاتىندا پرەمەر-مينيستردىڭ ورىنباسارى رومان سكليار مالىمدەدى، دەپ حابارلايدى Dalanews.kz.
رومان سكليار ۇلكەن مۇناي قورىنىڭ بارىنا قاراماستان قازاقستاندا مۇناي ونىمدەرى ءالى دە جەتكىلىكسىز وندىرىلەتىنىن باسا اتاپ ءوتتى.
"2017-2019 جىلدارى ءبىز ءۇش ءموز-دى قايتا جوندەپ، قۇرىلىمداۋدى اياقتادىق، ءسويتىپ جانار-جاعارماي ءوندىرىسى كولەمىن ەداۋىر ارتتىردىق. وسى ۋاقىتقا دەيىن بوي كورسەتىپ كەلگەن بەنزين، ديزەل، اۆياكەروسين تاپشىلىعى كىلت تىيىلدى. الايدا، اۆياكەروسين تۇتىنىسىنىڭ ايتارلىقتاي ارتۋىنا بايلانىستى بىزدە جەتىسپەۋشىلىك سەزىلەدى، سوندىقتان ونى سىرتتان ساتىپ الامىز"، - دەدى ول.
ونىڭ ايتۋىنشا، وتاندىق ءوندىرىستى ۇلعايتۋ جوسپاردا بار.
"بىزدەگى بەنزين مەن ديزەل كورشى مەملەكەتتەرمەن سالىستىرعاندا تىم ارزان. سونىڭ سالدارىنان شەتەلدىك ترانزيتتىك كولىكتەر جانارمايدى بىزدەن تولتىرىپ اكەتىپ جاتىر. سوندىقتان وتىن باعاسىن بىرتىندەپ تەڭەستىرەمىز. سونىمەن قاتار، جوسپاردا مۇناي وڭدەۋ كولەمىن 6-دان 12 ملن تونناعا دەيىن ۇلعايتۋعا مۇمكىندىك بەرەتىن شىمكەنت ءموز قۇرىلىسىنىڭ ەكىنشى كەزەڭى جانە قولدانىستاعى پاۆلودار جانە اتىراۋ زاۋىتتارىندا ونىمدىلىكتى ارتتىرۋ جونىندەگى ءىس-شارالار قاراستىرىلعان"، – دەدى ۆيسە-پرەمەر سكليار.
ايتا كەتەيىك، ەلدە وتىندى زاڭسىز ەكسپورتتاۋ كولەمى 50 پايىزعا قىسقارعان. بۇل تۋرالى ىشكى ىستەر مينيسترلىگى، ۇقك شەكارا قىزمەتى جانە مەملەكەتتىك كىرىستەر كوميتەتى بىرلەسىپ وتكىزگەن جيىندا ايتىلدى. جاۋاپتى ورگاندار "پەرەتوك" وپەراسياسىنىڭ ناتيجەسىندە "كولەڭكەلى" جانارماي ەكسپورتىنا قارسى كۇرەستە وسىنداي كورسەتكىشكە قول جەتكىزگەن.
