Resmi aqparatta «QTJ» UK» AQ Direktorlar keńesi tóraǵasynyń, táýelsiz direktory Kalman Shomodidiń ókilettigi merziminen buryn toqtatylyp, «QTJ» UK» AQ Direktorlar keńesiniń tóraǵasy, táýelsiz direktor Iýrii Lavrinenko bolyp sailanǵany jáne QTJ Direktorlar keńesi 9 adamnan turatyny, olardyń aty-jóni kórsetilgen jalpy tizim ataldy.
Alaida Shomodi myrzanyń kim ekeni, bul kompaniiada ne qyzmet kórsetip, qandai paidasy tigeni týraly lám-mim eshqandai aqparat joq. Tek resmi fakti men laýazym ieleriniń tizimi. Siz ben bizge, iaǵni «Qazaqstan temir joly» UK AQ jalǵyz aktsioneriniń salyq tóleýshilerine tiesili aqparat osy ǵana.
Jaqsy, bizdiń damýshy memleketimizdiń jańa tarihynda sheteldik mamandardy shaqyrý qalyptasqan jaǵdai. Memlekettik qurylymdarǵa táýelsiz direktorlar men basqarýshy-keńesshilerdi tartý dástúrge ainalǵan tájiribe.
Munyń ártúrli maqsattary bar: birinshiden, tiimdi halyqaralyq tájiribe, menedjment pen basqarý turǵysynan sheteldik mamandardy paidalaný arqyly menedjerlik jumys tájiribesin reformalaý.
Ekinshi sebep, ulttyq kompaniialar bir kezderi halyqaralyq naryqtarǵa shyǵyp, belgili bir birjalarda listing júrgizýge múddeli, árine, olardyń basqarýynda bedeldi, yqpaldy sheteldik mamannyń bolýy kompaniianyń investorlar aldyndaǵy reitingterine áser ete alady.
...
Biraq tiimdilik turǵysynan, bul azamattar elimizge tigizgen paidasy men bizdiń múddemizge atqarǵan qyzmetterine suraq kóp. Kezinde biz kimdi shaqyryp aqylyn tyńdamadyq?! Ulybritaniianyń burynǵy premer-ministri Toni Blerdiń de keńesin jylyna $6,3 mln satyp alyp tyńdadyq, Kalman Shomodi onyń janynda kim edi deisiz ǵoi?!
1959 jyly týǵan vengriialyq azamat. 1983-1989 jyldary aralyǵynda júk tasymalyna qatysty ártúrli laýazymdardy atqarǵan.
Shomodi myrzanyń mansaby kóbine Temir jol yntymaqtastyǵy uiymymen bailanysty.
Uzaq jyldar boiy temir jol yntymaqtastyǵy uiymy (TJYU, Varshava) komitetinde hatshy qyzmetinde bolǵan.
1989 jyldan bastap 1992 jylǵa deiingi kezeńde tóraǵanyń orynbasary, sonymen bir mezgilde kólik quqyǵy jónindegi komissiianyń tóraǵasy bolyp jumys istegen. 1993 jyldan bastap 1999 jylǵa deiingi kezeńde – kólik saiasaty jónindegi komissiianyń tóraǵasy, 2002 jyldan bergi kezeńde 2008 jylǵa deiin TJYU atqarýshy hatshysy qyzmetin atqarǵan.
Sonymen qatar, 2006 jyldan 2012 jylǵa deiin táýelsiz direktor retinde «QTJ» UK» AQ Direktorlar keńesiniń múshesi, «QTJ» UK» AQ Direktorlar keńesiniń aýdit jónindegi komitetiniń tóraǵasy, sondai-aq «QTJ» UK» AQ Direktorlar keńesiniń kadrlar jáne syiaqylar jónindegi komitetiniń múshesi bolady.
2011 jyldyń 1 maýsymynan bastap TJYU atqarýshy hatshysy bolyp ta jumys isteidi. Alǵash ret «QTJ» UK» AQ Direktorlar keńesiniń quramyna 2006 jylǵy 20 maýsymda sailaǵan, al 2009 jylǵy 21 maýsymda úsh jyl merzimge qaita sailanyp, 2014 jylǵy 1 tamyzda «QTJ» UK» AQ Direktorlar keńesiniń quramyna taǵy da qaita sailanǵan.
Al 2021 jyly «QTJ» UK» AQ 2021 jylǵy 7 qazandaǵy sheshimimen «QTJ» UK» AQ Direktorlar keńesine táýelsiz direktor jáne tóraǵa bolyp qaita sailanady.
Bul oqiǵalarǵa bailanysty Shomodi myrzasyz QTJ-nyń tańy atyp, kúni batpaityndai kórinip tursa, siz qatelespeisiz-aý. Alaida Qazaqstandaǵy Bermýd úshburyshy sekildi qupiia men syrǵa toly kompaniianyń bul syryn Shomodi keńes berip júrgen ýaqyttardaǵy kompaniianyń jalǵyz aktsioneri bolmasa da, jalǵyz tarihi iesi bola alǵan Mamin myrza ǵana biletin sekildi.
Sebebi ishtegi tereń lobbisiz mundai mansapty bizdiń Qazaqstan tarihynda Májilis depýtaty Mádi Elýbaev qana jasaǵan.
Direktorlar keńesip sonshalyqty ne isteidi, QTJ Kalman Shomodige keneshe jabysardai keregi qansha boldy dep oilap otyrsańyz?! Tarqatyp kóreiik.
...
Direktorlar keńesi strategiialyq maqsattardy, damýdyń basym baǵyttaryn aiqyndaidy jáne kompaniia qyzmetiniń uzaq merzimdi perspektivaǵa arnalǵan negizgi baǵdarlaryn belgileidi, qoiylǵan maqsattardy júzege asyrý úshin qajetti qarjylyq jáne adami resýrstardy qamtamasyz etedi. Direktorlar keńesi «QTJ» UK» AQ atqarýshy organynyń qyzmetin baqylaýdy júzege asyrady delingen resmi aqparat kózinde.
2021 jyly «QTJ» UK» AQ Direktorlar keńesi 13 betpe-bet jáne 4 syrttai (onlain) otyrys ótkizip, onda 190 másele qaralǵan. Sonyń ishinde iri kelisimder boiynsha 25 kelisimsharttyń taǵdyry sheshilgen.
Jaqsy, osy jerde Temir jol yntymaqtastyǵy uiymynyń qyzmeti men kei jumys baǵyttaryna toqtalyp ketsek.
Eń birinshi basty baǵyt halyqaralyq temir jol tasymaldaryn, eń aldymen, quramdastyrylǵan tasymaldardy qosa alǵanda, Eýropa men Aziia arasyndaǵy qatynasta damytý jáne jetildirý.
Siz ben biz ádette temirjol degende kóz aldymyzǵa birden saýdyraǵan vagondar men sabylǵan adamdardy elestetemiz. Alaida temirjol adam tasymalynan basqa júk tasymalynyń da birden-bir qainar kózi.
Bizdiń elimizdiń transshekaralyq, logistikalyq potentsialyn geografiiadan-aq kórýge bolady. Álemdegi eń iri taýar naryǵy Qytai men Eýropa arasyndaǵy basty kópir – Qazaqstan.
Al endi osy eki aradaǵy tariftik, quqyqtyq, ekonomikalyq normalar men kelisimderdiń bastaý alatyn jeri osy Temir jol yntymaqtastyǵy uiymy bolyp tabylady.
Iá, durys túsinip kele jatyrsyz, bizge nemese bireýge Shomodi myrza áý bastan kerek edi. Sebebi mundai úlken bizneste úlken múddeler bolady. Al utymdy múddege utymdy lobbi kerek.
Qazir endi bul múddeler qaqtyǵysy men kelisiminde bizdiń keiipkerimiz sekildi oiynshylar kerek bolmai qaldy ma dep oilap otyrsańyz. Bul jerde «Jańa Qazaqstandaǵy» QTJ-nyń jańa oiynshylary men jańa tarihy bastalyp jatyr dep qana túsinýge bolatyn sekildi.
Sebebi jyl basynda Prezident Q.J. Toqaevtyń ózi salalyq monopoliiaǵa qatysty qatań syn aityp, keiin «Qazaqstan temir joly» Ulttyq kompaniiasynyń enshiles uiymy «QTJ-Júk tasymaly» kásipornyna qatysty tergeý jumystary bastalǵan bolatyn.
Júk tasymalynyń 95% ielik etip otyrǵan kompaniiaǵa qatysty, monopolist birdei kelisimderge ártúrli sharttar qoiǵan dep aiyp taǵyldy. Korrýptsiialyq batpaqqa batqan Qazaqstan temir jolynyń taǵdyry aldaǵy naq osy direktorlar keńesinde sheshilýi ábden múmkin.
Osy aidyń 16 men 17-ne josparlanǵan keńes jiynynyń aldynda Shomodi sekildi oiynshydan aldyn ala qutylý QTJ tóraǵasy Saýranbaev josparynyń bir belgisi bolar.
Jaqynda ǵana Resei men eki aradaǵy júk tasymalynyń tómendegenin syltaýratqan Saýranbaev myrza memlekettik biýdjetten taǵy da 90 mlrd teńge qarjy suraǵan bolatyn.
Memleketten qomaqty qarjylar alyp otyrsa da, nesielik qaryzdarǵa belshesinen batqan QTJ júiesindegi mamindik, qulybaevtyq qaldyqtyq máselelerden tazarýdy kózdep otyrǵan jańa basshy, báribir halyqaralyq nemese ishki ekinshi deńgeili bankterden taǵy da qaryz alyp qana qutylatyn sekildi.
Bul óz kezeginde direktorlar bolyp jinalyp otyrǵan keńes pen basqarýshy menedjerdiń kásibiligine birden-bir syn.
Al bul synnan shyǵýdyń joly retindegi básti Saýranbaev myrza bastaǵan top eks-depýtat Lavrinenko Iýrii myrzaǵa qoiǵan sekildi.
Temir jol salasynyń búgi men shigin ishinen de, syrtynan da biletin Lavrinenko myrza eń birinshi júk tasymaly salasyndaǵy problemalardy sheshýge kúsh salatyndai kórinip tur. Siz de oilanyp qaldyńyz ba?!
Sonda shetelde oqyǵan, shetelden kelgen top-menedjerlerdiń keregi qansha dep?! Iá, Qazaqstan jańarǵysy kelgenmen, júie áli de eski ekenin umytpańyz.
Al Kalman Shomodidiń sheshken sharýalarynan qansha paida tapqany men bergen keńesteri úshin alǵan aqysy qupiia bolyp qala beredi. Sebebi siz ben bizge bilet baǵasy qymbattamasa bolǵany...
