Syrttanov aýylynda 800 túp alma aǵashy otyrǵyzyldy
Aqsý aýdandyq ákimdiginiń málimetine qaraǵanda, kóktem bastalǵaly óńir turǵyndary aǵash otyrǵyzý isine belsene kirisken. Búginge deiin aýdan aýmaǵynda órik, úieńki, qaraǵash, alma, týia, qaraǵai, shyrsha kóshetteri egilipti. Jalpy biylǵy jyly aýdanda 12 myńnan astam aǵash otyrǵyzý kózdelgen. Josparǵa sáikes aýyl turǵyndary 800 túp alma aǵashyn egip otyr.
Alma aǵashtar aýyldyń ishindegi bos jatqan jerlerge, Ǵ.Muratbaev atyndaǵy mekteptiń aýlasyna, turǵyn úi aýlalaryna otyrǵyzyldy. Endi olardy kútip baptaý ákimdikpen birge árbir mamannyń, ár turǵynnyń jaýapkershiliginde.
– Jerdiń tońy jibigen kezde shybyq qadap, tal otyrǵyzý – saýapty is. Óitkeni, jerge shanshylǵan árbir tal kútimi jaqsy bolsa, kúni erteń japyraq jaiǵan saialy baqqa ainalady. Biz jyl saiyn aǵash otyrǵyzý, kútip-baptaý jumystaryna turaqty airyqsha kóńil bólemiz. Sonyń ishinde jemis aǵashtaryna erekshe nazar aýdaryp otyrmyz. «Baǵban bolsań, baq ósir, balama dep taǵy ósir» deidi ǵoi. Endi sol aǵashtardy kútip-baptaýdy úlkenderden bastap balalarǵa deiin paryz sanap, ár turǵyn jaýapkershilikpen qarasa, bul is óz jemisin beredi ǵoi dep oilaimyn, – deidi B.Syrttanov aýyldyq okrýginiń ákimi Bekzat Ermuhanbetov.
Eske salsaq, Almaty oblysynda sanitarlyq tazartý, abattandyrý jáne kógaldandyrý ailyǵy júrýde. Oblystyq energetika jáne TÚKSh basqarmasynyń aqparatyna sáikes óńirdiń eldi mekenderinde kógaldandyrý jáne jasyl aimaqtar qurý jónindegi jol kartasy bekitilgen. Sonyń aiasynda jergilikti atqarýshy organdar aýmaqty tazartý boiynsha 3 senbilik ótkizip, 19,3 myń kóshet otyrǵyzdy.
