Qazaqstannyń Syrtqy ister ministrligi Taiaý Shyǵystaǵy shieleniske bailanysty el azamattaryna arnaiy úndeý jasady, dep habarlaidy Dalanews.kz.
Bul týraly vedomstvo 6 naýryz, juma kúni óziniń resmi saity men Telegram-arnasynda málimdedi.
Ministrliktiń habarlaýynsha, aimaqtaǵy áskeri qaqtyǵystardyń jalǵasýyna jáne óńirdiń kóptegen elderinde áýe keńistiginiń jabylýyna bailanysty qazaqstandyqtarǵa bul memleketterge barýdan ýaqytsha bas tartý usynylady.
«Taiaý Shyǵystaǵy áskeri is-qimyldardyń jalǵasýyna, sondai-aq óńir elderiniń kópshiliginde áýe keńistiginiń jabylýyna bailanysty SIM Qazaqstan azamattaryna belsendi urys qimyldary tolyq toqtap, jaǵdai tolyq turaqtalǵanǵa deiin atalǵan elderge kez kelgen sapardan bas tartýdy qatań túrde usynady», – delingen habarlamada.
Eskertý jasalǵan memleketter qatarynda Bahrein, Mysyr, Izrail, Iemen, Iordaniia, Irak, Iran, Katar, Saýd Arabiiasy Koroldigi, Kýveit, Livan, Birikken Arab Ámirlikteri, Oman jáne Siriia bar.
Syrtqy ister ministrligi osy óńirde júrgen qazaqstandyqtardy jeke qaýipsizdik sharalaryn kúsheitýge shaqyrdy. Sondai-aq qaýipti bolýy múmkin aimaqtarǵa barmaý, jergilikti bilik organdarynyń talaptaryn oryndaý, zymyran qaýpi týyndaǵan jaǵdaida dereý baspanalar men panalaý oryndaryna barý qajettigin eskertti.
Sonymen qatar azamattarǵa Qazaqstannyń sheteldegi mekemelerimen, týroperatorlarmen jáne áýe tasymaldaýshylarymen turaqty bailanysta bolý usynyldy.
