قازاقستاننىڭ سىرتقى ىستەر مينيسترلىگى تاياۋ شىعىستاعى شيەلەنىسكە بايلانىستى ەل ازاماتتارىنا ارنايى ۇندەۋ جاسادى، دەپ حابارلايدى Dalanews.kz.
بۇل تۋرالى ۆەدومستۆو 6 ناۋرىز، جۇما كۇنى ءوزىنىڭ رەسمي سايتى مەن Telegram-ارناسىندا مالىمدەدى.
مينيسترلىكتىڭ حابارلاۋىنشا، ايماقتاعى اسكەري قاقتىعىستاردىڭ جالعاسۋىنا جانە ءوڭىردىڭ كوپتەگەن ەلدەرىندە اۋە كەڭىستىگىنىڭ جابىلۋىنا بايلانىستى قازاقستاندىقتارعا بۇل مەملەكەتتەرگە بارۋدان ۋاقىتشا باس تارتۋ ۇسىنىلادى.
«تاياۋ شىعىستاعى اسكەري ءىس-قيمىلداردىڭ جالعاسۋىنا، سونداي-اق ءوڭىر ەلدەرىنىڭ كوپشىلىگىندە اۋە كەڭىستىگىنىڭ جابىلۋىنا بايلانىستى ءسىم قازاقستان ازاماتتارىنا بەلسەندى ۇرىس قيمىلدارى تولىق توقتاپ، جاعداي تولىق تۇراقتالعانعا دەيىن اتالعان ەلدەرگە كەز كەلگەن ساپاردان باس تارتۋدى قاتاڭ تۇردە ۇسىنادى»، – دەلىنگەن حابارلامادا.
ەسكەرتۋ جاسالعان مەملەكەتتەر قاتارىندا باحرەين، مىسىر، يزرايل، يەمەن، يوردانيا، يراك، يران، كاتار، ساۋد ارابياسى كورولدىگى، كۋۆەيت، ليۆان، بىرىككەن اراب امىرلىكتەرى، ومان جانە سيريا بار.
سىرتقى ىستەر مينيسترلىگى وسى وڭىردە جۇرگەن قازاقستاندىقتاردى جەكە قاۋىپسىزدىك شارالارىن كۇشەيتۋگە شاقىردى. سونداي-اق ءقاۋىپتى بولۋى مۇمكىن ايماقتارعا بارماۋ، جەرگىلىكتى بيلىك ورگاندارىنىڭ تالاپتارىن ورىنداۋ، زىمىران ءقاۋپى تۋىنداعان جاعدايدا دەرەۋ باسپانالار مەن پانالاۋ ورىندارىنا بارۋ قاجەتتىگىن ەسكەرتتى.
سونىمەن قاتار ازاماتتارعا قازاقستاننىڭ شەتەلدەگى مەكەمەلەرىمەن، تۋروپەراتورلارمەن جانە اۋە تاسىمالداۋشىلارىمەن تۇراقتى بايلانىستا بولۋ ۇسىنىلدى.
