Almatyda balalardyń qaýipsizdigin jańa deńgeige shyǵarý maqsatynda «SIM KIDS» jobasy resmi túrde iske qosyldy. Bul – internetke qaýipsiz ári baqylanatyn qoljetimdilik beretin arnaiy SIM-karta. Joba ata-analardyń sanasynda júrgen bir suraqqa «balam internette ne kórip júr?» degen alańdaýshylyqqa naqty jaýap berý úshin jasalǵan.
Bas prokýratýranyń málimetinshe, bul bastama 2023-2025 jyldarǵa arnalǵan balalardy zorlyq-zombylyqtan qorǵaý, sýitsidtiń aldyn alý jáne olardyń quqyqtary men ál-aýqatyn qamtamasyz etý jónindegi keshendi jospar aiasynda daiyndalǵan.
Almaty qalasynyń prokýratýrasy TELE2/ALTEL bailanys operatorymen birlesip qolǵa alǵan bul pilottyq joba – balalardy internet keńistigindegi destrýktivti kontentten qorǵaýǵa baǵyttalǵan naqty qadamdardyń biri.
«SIM KIDS» SIM-kartasy birqatar erekshe fýnktsiialarmen qamtylǵan. Birinshiden, avtomatty túrde ziiandy kontentti buǵattaidy. Ekinshiden, ata-analar balasynyń qandai qosymshalardy paidalanatynyn qadaǵalap, qajet bolǵan jaǵdaida shekteý qoia alady. Úshinshiden, bala telefony dybyssyz rejimde bolsa da, ata-anasy bailanysqa shyǵa alady. Bul – kúndelikti ómirde asa qajet ári tiimdi qural.
Qazirgi tańda joba synaq kezeńinen sátti ótip, endi kez kelgen qalaǵan ata-anaǵa qoljetimdi. Qarapaiym sheshimder – úlken qaýipsizdiktiń bastaýy. Bul joba – zamanaýi tehnologiia men ata-analyq qamqorlyqtyń úilesimi dese bolady.
Bas prokýratýra eske salyp ótkendei, biyldyń ózinde 4 aidyń ishinde balalarǵa qatysty 1 309 qylmys tirkelgen. Bul – resmi statistika ǵana. Sondyqtan bala qaýipsizdigi tek quqyq qorǵaý organdarynyń emes, búkil qoǵamnyń, árbir ata-ananyń kún tártibinde turýy tiis. SIM-karta bir ǵana qural. Al eń mańyzdysy – ata-ananyń qadaǵalaýy men qamqorlyǵy.
«SIM KIDS» – ata-ana men bala arasyndaǵy tsifrlyq kópir. Qaýipsizdikke baǵyttalǵan qarapaiym, biraq mańyzdy qadam. Almatyda bastalǵan bul tájiribe el boiynsha keńeise, balalardy qorǵaý isindegi bir eleýli olqylyqtyń ornyn toltyrýǵa múmkindik týady. Bala bolashaǵyn saqtaý – búginnen bastalýy tiis.
