الماتىدا بالالاردىڭ قاۋىپسىزدىگىن جاڭا دەڭگەيگە شىعارۋ ماقساتىندا «SIM KIDS» جوباسى رەسمي تۇردە ىسكە قوسىلدى. بۇل – ينتەرنەتكە ءقاۋىپسىز ءارى باقىلاناتىن قولجەتىمدىلىك بەرەتىن ارنايى SIM-كارتا. جوبا اتا-انالاردىڭ ساناسىندا جۇرگەن ءبىر سۇراققا «بالام ينتەرنەتتە نە كورىپ ءجۇر؟» دەگەن الاڭداۋشىلىققا ناقتى جاۋاپ بەرۋ ءۇشىن جاسالعان.
باس پروكۋراتۋرانىڭ مالىمەتىنشە، بۇل باستاما 2023-2025 جىلدارعا ارنالعان بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن ءال-اۋقاتىن قامتاماسىز ەتۋ جونىندەگى كەشەندى جوسپار اياسىندا دايىندالعان.
الماتى قالاسىنىڭ پروكۋراتۋراسى TELE2/ALTEL بايلانىس وپەراتورىمەن بىرلەسىپ قولعا العان بۇل پيلوتتىق جوبا – بالالاردى ينتەرنەت كەڭىستىگىندەگى دەسترۋكتيۆتى كونتەنتتەن قورعاۋعا باعىتتالعان ناقتى قادامداردىڭ ءبىرى.
«SIM KIDS» SIM-كارتاسى ءبىرقاتار ەرەكشە فۋنكسيالارمەن قامتىلعان. بىرىنشىدەن، اۆتوماتتى تۇردە زياندى كونتەنتتى بۇعاتتايدى. ەكىنشىدەن، اتا-انالار بالاسىنىڭ قانداي قوسىمشالاردى پايدالاناتىنىن قاداعالاپ، قاجەت بولعان جاعدايدا شەكتەۋ قويا الادى. ۇشىنشىدەن، بالا تەلەفونى دىبىسسىز رەجيمدە بولسا دا، اتا-اناسى بايلانىسقا شىعا الادى. بۇل – كۇندەلىكتى ومىردە اسا قاجەت ءارى ءتيىمدى قۇرال.
قازىرگى تاڭدا جوبا سىناق كەزەڭىنەن ءساتتى ءوتىپ، ەندى كەز كەلگەن قالاعان اتا-اناعا قولجەتىمدى. قاراپايىم شەشىمدەر – ۇلكەن قاۋىپسىزدىكتىڭ باستاۋى. بۇل جوبا – زاماناۋي تەحنولوگيا مەن اتا-انالىق قامقورلىقتىڭ ۇيلەسىمى دەسە بولادى.
باس پروكۋراتۋرا ەسكە سالىپ وتكەندەي، بيىلدىڭ وزىندە 4 ايدىڭ ىشىندە بالالارعا قاتىستى 1 309 قىلمىس تىركەلگەن. بۇل – رەسمي ستاتيستيكا عانا. سوندىقتان بالا قاۋىپسىزدىگى تەك قۇقىق قورعاۋ ورگاندارىنىڭ ەمەس، بۇكىل قوعامنىڭ، ءاربىر اتا-انانىڭ كۇن تارتىبىندە تۇرۋى ءتيىس. SIM-كارتا ءبىر عانا قۇرال. ال ەڭ ماڭىزدىسى – اتا-انانىڭ قاداعالاۋى مەن قامقورلىعى.
«SIM KIDS» – اتا-انا مەن بالا اراسىنداعى سيفرلىق كوپىر. قاۋىپسىزدىككە باعىتتالعان قاراپايىم، ءبىراق ماڭىزدى قادام. الماتىدا باستالعان بۇل تاجىريبە ەل بويىنشا كەڭەيسە، بالالاردى قورعاۋ ىسىندەگى ءبىر ەلەۋلى ولقىلىقتىڭ ورنىن تولتىرۋعا مۇمكىندىك تۋادى. بالا بولاشاعىن ساقتاۋ – بۇگىننەن باستالۋى ءتيىس.
