Qazaqstannyń Syrtqy ister ministrligi Eýroodaqpen júrgizilip jatqan kelissózderge qatysty túsinikteme berip, olardyń tek vizalyq talaptardy jeńildetý men readmissiia máselelerine qatysty ekenin málimdedi, dep habarlaidy dalanews.kz.
Vedomstvonyń resmi ókili Erlan Jetibaevtyń aitýynsha, kelissózder Qazaqstan azamattaryna arnalǵan vizalyq rejimdi jeńildetý jáne readmissiia týraly kelisimderdi talqylaý aiasynda ǵana júrgizilip jatyr.
Ol Qazaqstan aýmaǵynda bosqyndardy ustaý ortalyqtaryn qurý máselesi boiynsha eshqandai kelissóz júrip jatpaǵanyn erekshe atap ótti.
«Readmissiia týraly kelisim Qazaqstan azamattary elden zańsyz ketken jaǵdaida olardy qaita qabyldaý mindettemesin ǵana bildiredi», – dep túsindirdi Jetibaev.
Syrtqy ister ministrliginiń málimetinshe, kelissózder byltyrǵy 2 jeltoqsanda Briýsselde bastalǵan. Olar eki negizgi baǵyt boiynsha júrgizilip jatyr: vizalyq rejimdi jeńildetý jáne readmissiia.
Buǵan deiin ministrlik kelissózderdi 2026 jyldyń ekinshi jartysynda aiaqtaý josparlanyp otyrǵanyn habarlaǵan edi.
