Syrtqy ister ministrligi Dýbaidaǵy Fairmont The Palm kesheninde qazaqstandyqtarǵa tiesili páterler týraly naqty aqparat joq ekenin málimdedi, dep habarlaidy Dala news.
Buǵan deiin jýrnalist Manas Qaiyrtai 2022 jylǵy C4ADS uiymynyń esebine silteme jasap, atalǵan keshennen qazaqstandyqtar shamamen 97 páter satyp alǵanyn habarlaǵan edi.
Alaida Syrtqy ister ministriniń orynbasary Álibek Baqaev bul máselege qatysty azamattardan eshqandai ótinish túspegenin aitty.
«Bizde bul jyljymaityn múliktiń naqty kimge tiesili ekeni týraly aqparat joq. Jalpy Dýbaida jáne Taiaý Shyǵysta Qazaqstan azamattary turady. Biraq kimniń qai úide turatyny jóninde málimet bizde joq», — dedi ol úkimettegi brifingte.
Ministrlik sheteldegi azamattardyń jeke múlki týraly derekterdi júieli túrde júrgizbeitinin atap ótti.
