Óskemendegi A. Baıtursynov atyndaǵy №20 orta mektebinde bastaýysh synyp muǵalimi Gúlim Seıtbekova ekinshi synyp oqýshylaryna ashyq sabaq ótkizdi. Ol balalarǵa Táýelsizdik – eldiń basty qundylyǵy, sondaı-aq, memleket qandaı jetistikterge qol jetkizgeni týraly aıtyp berdi.
– Qazaqstan úlken joldy baǵyndyrdy. Birqatar reformalar engizildi. 1991 jyly Nursultan Nazarbaevtyń Jarlyǵymen Semeı ıadrolyq polıgony jabyldy. Sol jyly tuńǵysh qazaq ǵaryshkeri Toqtar Áýbákirov ǵaryshqa ushty. 1992 jyly Qazaqstannyń Memlekettik rámizderi – egemendigimizdiń myzǵymas negizderi qabyldandy. Kelesi jyly aınalysqa Táýelsizdiktiń taǵy bir atrıbýty – ulttyq valúta engizildi. 1994 jyly elordany Almatydan Aqmolaǵa aýystyrý týraly sheshim qabyldandy. Keıin ol Astana dep ataldy. Az ýaqyttyń ishinde elorda tanymastaı ózgerdi, – deıdi Gúlim Seıtbekova.
Sondaı-aq, ol oqýshylarǵa 2011 jyly Qazaqstanda VII Qysqy Azıa oıyndarynyń ótkiziletini týraly aıtyp berdi. Sol kezde qazaqstandyq sportshylar 70 medal, onyń ishinde 32 altyn jeńip aldy. Kelesi jyly Qazaqstan álemniń básekege qabiletti 50 ekonomıkasynyń qataryna endi. Ashyq sabaq barysynda balalar eń mańyzdy jáne aýqymdy is-sharalardyń biri - halyqaralyq, mamandandyrylǵan EXPO kórmesin talqylady. 2017 jyly Qazaqstan TMD-da ony ótkizgen alǵashqy el boldy. Sol kezde kórmege 115 memleket pen 22 halyqaralyq uıym qatysty. Kórmeniń taqyryby jasyl energıa boldy. Sonymen qatar, pedagog oqýshylarǵa Qazaqstannyń qazirgi prezıdenti Qasym-Jomart Toqaevtyń qandaı jumys júrgizip jatqany týraly aıtyp berdi.
Oqýshylar ashyq sabaqqa úlken qyzyǵýshylyqpen qatysyp, óz áserlerimen bólisti.
– Maǵan bul sabaq óte unady. Ustazymyz elimizdiń qalyptasý tarıhyndaǵy jetistikteri týraly aıtyp berdi. Biz kóp nárseni bildik. Men elordamyz Nur-Sultanda boldym. Ol óte ádemi qala, bárinen buryn maǵan Báıterek unady, – dep óz áserimen bólisti №20 orta mekteptiń ekinshi synyp oqýshysy Arsen Qalıev.
Oqý jyly boıy oblys mektepterinde Qazaqstan Respýblıkasy Táýelsizdiginiń 30 jyldyǵyn merekeleýge arnalǵan túrli is-sharalar josparlanǵan.
