Jiynda oblys ákiminiń orynbasary Shakárim Buqtuǵutov ótken alty ai ishinde óńirde syrqattanǵandar sany 15 esege tómendegenin aitty. Eger ótken jyldyń qarasha aiynda koronavirýsqa shaldyqqandar sany 9,7 myńnan astam adam bolsa, naýryzda bul kórsetkish 645-ke azaiǵan. Epidemiologiialyq jaǵdai sáýir aiynda ýshyǵa bastady. Ol kezde aýrý juqtyrǵandar sany 2,8 ese ósken. Búgingi kúni osyndai 1057 jaǵdai tirkeldi.
Oblystaǵy epidemiologiialyq jaǵdaidy turaqtandyrýdyń eń ońtaily joly ol – vaktsinatsiialaý. Esterińizge sala keteiik, sáýir aiynyń basynan beri óńirde meditsina qyzmetkerleri, quqyq qorǵaý organdarynyń qyzmetkerleri, pedagogtar men sozylmaly aýrýlary bar adamdardan basqa Shyǵys Qazaqstannyń barlyq turǵyndaryna koronavirýsqa qarsy vaktsina salyna bastady.
Qazir oblysta 380 mamandandyrylǵan ekpe salý pýnktteri ashyldy. Sáýirdiń basynda COVID-19-dan vaktsinatsiialanǵan adamdardyń sany 14,5 myńǵa jetken. Búginde bul kórsetkish 3 esege ósken. Iaǵni, 48,5 myń adamǵa artty.
Shákárim Buqtuǵutovtyń aitýynsha, sáýir aiynyń sońyna deiin vaktsinanyń 72 myń dozasy jetkiziledi. Qazan aiynyń basyna deiin óńirde koronavirýstan 747 myń adamdy nemese ShQO turǵyndarynyń jalpy sanynyń 53 paiyzyn egý josparlanǵan. Bul úshin barlyq múmkindikter bar. Tek bir táýlikte 380 pýnktte 13 300 adam, al bir aida 292 600 adam vaktsina alýy kerek.
– Qazir biz vaktsinanyń birinshi komponentimen halyqty vaktsinatsiialaý josparyn tolyqtai oryndadyq. Vaktsinanyń jańa dozalaryn jetkizýdi kútemiz jáne birinshi kezekte Óskemen, Semei, Aiagóz jáne ónerkásiptik kásiporyndardyń egý pýnktterine jiberemiz, – dedi Danial Ahmetov.
