Qazaqstanda 2025 jyldyń 1 tamyzy men 20 qazany aralyǵynda agrarlyq sektordyń jaı-kúıi týraly ózekti derekterdi alýǵa baǵyttalǵan eń aýqymdy statısıkalyq baqylaý — Ulttyq aýyl sharýashylyǵy sanaǵy ótedi. Bul jaıly QR Startegıalyq josparlaý jáne reformalar agenttigi Ulttyq statısıka búrosynyń SHQO boıynsha Departamentiniń basshysy Ernaz Nurlanov málimdedi, – dep habarlaıdy Dalanews.kz
Sanaq Memleket basshysynyń tapsyrmasyna sáıkes ótkiziledi jáne aýyl sharýashylyǵy jumystarynyń maýsymdylyǵyn eskere otyryp, Úkimetpen bekitilgen. Ol eki kezeńde júrgiziledi:
- 1–31 tamyz aralyǵynda — respondentter sanaq.gov.kz portalynda sanaq paraqtaryn óz betinshe toltyra alatyn onlaın-saýalnama;
- 20 qyrkúıek pen 20 qazan aralyǵynda — onlaın-anketa toltyrmaǵan úı sharýashylyqtaryna ıntervúerler baratyn oflaın-kezeń.
Oǵan deıin, maýsym aıynda, Shyǵys Qazaqstan oblysynyń bes qalasynda aldaǵy sanaqqa qatysýshylardyń tizimin naqtylaý maqsatynda aldyn ala aralaý (lıstıń) jumystary ótedi.
Ernaz Nurlanovtyń aıtýynsha, sanaqqa qatysý — formaldylyq emes, eldiń aýyl sharýashylyǵynyń bolashaǵyna qosylatyn naqty úles.
«Barlyq azamattardy sanaqqa belsendi qatysýǵa shaqyramyz. Bul jaı ǵana statısıkalyq shara emes, bul — azyq-túlik qaýipsizdigi, fermerlerdi qoldaý jáne óńirlerdi damytý boıynsha sheshimderdiń negizi. Tek senimdi derekter ǵana tıimdi memlekettik agrarlyq saıasatty qalyptastyrýǵa múmkindik beredi», - deıdi maman.
Sanaqqa qatysýy tıis:
- ósimdik sharýashylyǵymen, mal sharýashylyǵymen jáne balyq sharýashylyǵymen aınalysatyn zańdy tulǵalar, jeke kásipkerler men fermerlik qojalyqtar;
- jeke qosalqy sharýashylyqpen aınalysatyn, mal ustaıtyn, baý-baqshasy ne jeri bar úı sharýashylyqtary.
Oblys boıynsha 92 myńnan astam úı sharýashylyǵy men 9,8 myńǵa jýyq aýyl sharýashylyǵy óndirýshisi qamtylady dep kútilýde. Sanaqty ótkizý úshin óńirde 150-den astam ıntervúer jumys isteıtin bolady.
Azamattardyń yńǵaıy úshin aýyldyq ákimdikter men aýdandyq statısıka bólimderinde ınternetke qosylǵan ózine-ózi qyzmet kórsetý aımaqtary ashylady. Sondaı-aq sanaq.gov.kz saıtyndaǵy Sanaq-Myrza vırtýaldy kómekshisine júginýge nemese 1446 baılanys ortalyǵyna qońyraý shalýǵa bolady.
