قازاقستاندا 2025 جىلدىڭ 1 تامىزى مەن 20 قازانى ارالىعىندا اگرارلىق سەكتوردىڭ جاي-كۇيى تۋرالى وزەكتى دەرەكتەردى الۋعا باعىتتالعان ەڭ اۋقىمدى ستاتيستيكالىق باقىلاۋ — ۇلتتىق اۋىل شارۋاشىلىعى ساناعى وتەدى. بۇل جايلى ق ر ستارتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ شقو بويىنشا دەپارتامەنتىنىڭ باسشىسى ەرناز نۇرلانوۆ مالىمدەدى، – دەپ حابارلايدى Dalanews.kz
ساناق مەملەكەت باسشىسىنىڭ تاپسىرماسىنا سايكەس وتكىزىلەدى جانە اۋىل شارۋاشىلىعى جۇمىستارىنىڭ ماۋسىمدىلىعىن ەسكەرە وتىرىپ، ۇكىمەتپەن بەكىتىلگەن. ول ەكى كەزەڭدە جۇرگىزىلەدى:
- 1–31 تامىز ارالىعىندا — رەسپوندەنتتەر sanaq.gov.kz پورتالىندا ساناق پاراقتارىن ءوز بەتىنشە تولتىرا الاتىن ونلاين-ساۋالناما؛
- 20 قىركۇيەك پەن 20 قازان ارالىعىندا — ونلاين-انكەتا تولتىرماعان ءۇي شارۋاشىلىقتارىنا ينتەرۆيۋەرلەر باراتىن وفلاين-كەزەڭ.
وعان دەيىن، ماۋسىم ايىندا، شىعىس قازاقستان وبلىسىنىڭ بەس قالاسىندا الداعى ساناققا قاتىسۋشىلاردىڭ ءتىزىمىن ناقتىلاۋ ماقساتىندا الدىن الا ارالاۋ (ليستينگ) جۇمىستارى وتەدى.
ەرناز نۇرلانوۆتىڭ ايتۋىنشا، ساناققا قاتىسۋ — فورمالدىلىق ەمەس، ەلدىڭ اۋىل شارۋاشىلىعىنىڭ بولاشاعىنا قوسىلاتىن ناقتى ۇلەس.
«بارلىق ازاماتتاردى ساناققا بەلسەندى قاتىسۋعا شاقىرامىز. بۇل جاي عانا ستاتيستيكالىق شارا ەمەس، بۇل — ازىق-تۇلىك قاۋىپسىزدىگى، فەرمەرلەردى قولداۋ جانە وڭىرلەردى دامىتۋ بويىنشا شەشىمدەردىڭ نەگىزى. تەك سەنىمدى دەرەكتەر عانا ءتيىمدى مەملەكەتتىك اگرارلىق ساياساتتى قالىپتاستىرۋعا مۇمكىندىك بەرەدى»، - دەيدى مامان.
ساناققا قاتىسۋى ءتيىس:
- وسىمدىك شارۋاشىلىعىمەن، مال شارۋاشىلىعىمەن جانە بالىق شارۋاشىلىعىمەن اينالىساتىن زاڭدى تۇلعالار، جەكە كاسىپكەرلەر مەن فەرمەرلىك قوجالىقتار؛
- جەكە قوسالقى شارۋاشىلىقپەن اينالىساتىن، مال ۇستايتىن، باۋ-باقشاسى نە جەرى بار ءۇي شارۋاشىلىقتارى.
وبلىس بويىنشا 92 مىڭنان استام ءۇي شارۋاشىلىعى مەن 9،8 مىڭعا جۋىق اۋىل شارۋاشىلىعى ءوندىرۋشىسى قامتىلادى دەپ كۇتىلۋدە. ساناقتى وتكىزۋ ءۇشىن وڭىردە 150-دەن استام ينتەرۆيۋەر جۇمىس ىستەيتىن بولادى.
ازاماتتاردىڭ ىڭعايى ءۇشىن اۋىلدىق اكىمدىكتەر مەن اۋداندىق ستاتيستيكا بولىمدەرىندە ينتەرنەتكە قوسىلعان وزىنە-وزى قىزمەت كورسەتۋ ايماقتارى اشىلادى. سونداي-اق sanaq.gov.kz سايتىنداعى Sanaq-Myrza ۆيرتۋالدى كومەكشىسىنە جۇگىنۋگە نەمەسە 1446 بايلانىس ورتالىعىنا قوڭىراۋ شالۋعا بولادى.
