Shyǵys Qazaqstan oblysynyń ákimi Nurymbet Saqtaǵanov qala jáne aýdan ákimderiniń qatysýymen sý tasqyny kezeńinen ótý máseleleri boiynsha keńes ótkizdi, - dep habarlaidy Dalanews.kz
Eske salaiyq, 1 aqpannan bastap Shyǵys Qazaqstanda jedel shtab jumys isteidi. Onda barlyq eldi mekennen aqparat kelip túsedi. Glýbokoe, Shemonaiha, Altai aýdandary men Ridder qalasy erekshe baqylaýda. Sebebi biyl munda qalyń qar jaýdy.
Óńir basshysy taiaýda Óskemende shatyrdan qulaǵan qardyń birneshe kólikti zaqymdaǵanyn eske saldy. Belgili bolǵandai, oblys ortalyǵyndaǵy 1200 úidiń basqarý nysany joq. Bul baspanalar QSK-ǵa qosylmaǵan, MIB nemese jai seriktestik te qurylmaǵan.
"Bul - energetika jáne TÚKSh basqarmasy tarapynan jiberilgen qatelik. Óitkeni basqarýdyń jańa nysandaryna kóshý jumystary birneshe jyl buryn bastalǵan. 1 mamyrǵa deiin ár úige qatysty másele sheshilýi kerek. Sondai-aq bir apta ishinde turǵyndarǵa shatyrdaǵy muz ben aýladaǵy qardy tazalaýǵa kómektesý qajet", - dedi oblys ákimi.
Búgingi tańda oblystaǵy barlyq gidrotehnikalyq qurylys tekserilip, olardyń jai-kúii táýlik boiy qadaǵalanýda. Turǵyndar men ákimdikter qaida barý kerektigin bilýi úshin jaýapty tulǵalardyń aty-jóni men bailanys nómiri kórsetilgen kezekshilik kestesin jasaýǵa basa nazar aýdaryldy.
Shyǵys Qazaqstan ózenderinde jarylys jumystary bastalyp, 19 núkte anyqtaldy. Jaýyn-shashyn men kúnniń jylynýyna bailanysty gidrotehnikalyq qurylystardy taǵy bir márte tekserip, sý tasqynyna qarsy is-sharalardy júrgizý kezinde turǵyndardyń tájiribesin jáne kópjyldyq baqylaý nátijelerin qosymsha esepke alý qajettigi aityldy.
Aýyldyq jerlerde úiler men irgeles aýmaqtarǵa sý kirmeýi úshin ainalma arnalardy daiyndaýǵa nazar aýdarý kerek. Nurymbet Saqtaǵanov atap ótkendei, barlyq tehnika men arnaiy toptar daiyn tur. Ýaqytsha ornalastyrý pýnktteri 21 myń adamdy qabyldai alady. Sondai-aq mańyzdy áleýmettik nysandarǵa kiretin joldarǵa tekserý júrgizip, kópirlerdegi qorshaýlardy tekserý, qajet bolǵan jaǵdaida aýystyrý kerek.
"Ákimder turǵyndarmen aqparattyq-túsindirý jumystaryn belsendi júrgizip, barlyq qural-jabdyq pen tehnikany taǵy bir ret teksergen jón. Tótenshe jaǵdai kezinde aýyr tehnikamen qamtamasyz etý úshin jergilikti sharýa qojalyqtarymen, kásiporyndarmen kelisim-shart jasaý kerek", – dep atap ótti Nurymbet Saqtaǵanov.
Sondai-aq ol sý tasqyny jaǵdaiy turaqty baqylaýda ekenin jáne árbir eldi meken boiynsha naqty is-qimyl algoritmi ázirlengenin atap ótti.
