ShQO-da qara sózdiń zergeri Qalihan Ysqaqovtyń 90 jyldyq mereitoiyna arnalǵan respýblikalyq aqyndar aitysy máresine jetti, - dep habarlaidy Dalanews.kz
Elimizdiń túkpir-túkpirinen kelgen on eki aqyn sóz saiystyrǵan jyr básekesiniń ekinshi ainalymyna qarsylastarynan joǵary upai alǵan Serik Qýanǵan, Aspanbek Shuǵataev, Rústem Qaiyrtaiuly, Jansaia Mýsina, Birjan Baitýov jáne Iranǵaiyp Kúzembaev syndy aýzymen qus tistegen júirik aqyndar bir jarym saǵat boiy ózara sóz saiystyryp, «kim myqtyny» anyqtady.
Aitys barysynda ashy da tushy taqyryptar, oryndy ázil-qaljyń men eldik máseleler qozǵalyp, kórermenniń qoldaýyna ie boldy.
Oblys ortalyǵynda araǵa on jyl salyp qaita uiymdastyrylǵan aitys – ultymyzdyń erekshe óneri retinde saǵynǵan halyqtyń aiyzyn qandyrdy. Qazylar alqasynyń biraýyzdy sheshimimen alty saǵatqa sozylǵan jyr básekesiniń bas júldesin taiaýda ǵana Tarazdan bas júldemen oralǵan jerlesimiz, talantty aqyn Serik Qýanǵan qanjyǵasyna bailady.
Aitystyń bas júldesin Shyǵys Qazaqstan oblysynyń ákimi Nurymbet Saqtaǵanov ózi tabystap, aitysty jarty kúnnen astam tapjylmai tyńdaǵan kórermenge, sóz marjanyn sapyrǵan aqyndarǵa, aitysqa arnaiy kelgen aqyn Júrsin Erman men depýtat Amanjol Áltaevqa, sondai-aq ózge de qazylar alqasyna rizashylyǵyn bildirdi.
"Búgin Shyǵysymyzda sán-saltanaty jarasqan keremet kesh ótti. Aitys óneriniń jankúierleri - sizderge, ot aýyz, oraq tildi, sáigúliktei júzden júirik shyqqan, búgin baǵy janyp, baby kelip turǵan aityskerlerge - basymyzdy iip úlken rahmetimizdi aitamyz. Buiyrtsa, Qalihan Ysqaq esiminiń qurmetine arnalǵan is-sharalar legi jazda respýblikalyq deńgeide Katonqaraǵaida da jalǵasyn tabady. Qara sózdiń has sheberi bolǵan aǵamyzdyń ónegeli ómiri – bolashaq urpaqqa úlgi. Sondyqtan osyndai rýhani is-sharalar jalǵasyn tabýy tiis. Qazaqtyń aitysy barda, rýhymyz berik, bolashaǵymyz aiqyn!",- dedi aimaq basshysy.
Júldeli birinshi orynǵa aqtyq saiysta Serik Qýanǵanmen sóz talastyrǵan talantty aqyn, semeilik Rústem Qaiyrtaiuly laiyq dep tanylsa, júldeli ekinshi oryndy qyzylordalyq Iranǵaiyp Kúzembaev pen pavlodarlyq Aspanbek Shuǵataev ózara bólisti.
Úshinshi oryn oraldyq Jansaia Mýsina men ońtústikten kelgen Birjan Baitýovqa buiyrdy.
Aitysqa úles qosqan ózge aqyndardyń barlyǵyna el atynan qomaqty syi-siiapat kórsetildi.
