Shyǵys Qazaqstan oblysynyń bir aýdanynda baǵaly paıdaly qazbalardy zańsyz óndirdi degen kúdikpen alty adam ustaldy. Bul týraly QR İshki ister mınıstrliginiń resmı ınternet-resýrsy málimdedi, dep habarlaıdy Dalanews.kz.
“SHQO Polısıa departamentiniń uıymdasqan qylmysqa qarsy kúres basqarmasy aımaq aýmaǵynda qymbat metaldardy zańsyz óndirip kelgen bir top adamdy anyqtady”, – delingen habarlamada.
Kúdiktilerdiń áreketi áýeden túsirilgen beınejazbalar arqyly áshkerelengen.
Tergeý sharalary aıasynda ekskavator, úsh metal izdegish qurylǵy, eki avtokólik jáne topyraq úlgileri tárkilendi.
Atalǵan derek boıynsha sotqa deıingi tergeý bastaldy. Jer qoınaýyn paıdalanýǵa keltirilgen zalaldy anyqtaý úshin saraptama taǵaıyndalǵan.
