Brifing barysynda basqarma basshysy biyl órt sónidirýshilerdiń jumysy maýsym aiynda shyrqaý shegine jetkenin de tilge tiek etti. Dál osy aida óńirdegi orman órtteri kúrt órship, órt sóndirýshiler ormanshylarmen birge 100 ret órt sóndirýge májbúr bolǵan. Tilsiz jaý birneshe ret eldi-mekenderge taiaǵan sátte óshiriligen kezderi de bolypty.
– Ol kezde jaǵdai óte qiyn boldy. Kúnniń ysýy, naizaǵai, jeldiń uitqyp soǵyýy jáne halyqtyń otty durys jaqpaý jaǵdaidy odan beter ýshyqtyra tústi. Biylǵy jyl jazyq daladaǵy ormandy alqaptardaǵy órttiń de qaýipti ekenin taǵy bir eske saldy. Jazyq daladaǵy orman órtteri tez taralyp, birqansha qiyndyqtar týǵyzdy, – deidi Nurjan Ómirjanov.
Brifing barysynda sóz alǵan ShQO Tabiǵi resýrstar jáne tabiǵi resýrstardy tiimdi paidalaný basqarmasy basshysynyń orynbasary Arman Esentaev tilsiz jaýdyń aldyn alý úshin oblystyq biýdjetten 295,6 mln teńge bólinip, oǵan jeńil doǵalaqty jáne shynjyr tabandy taraktorlar men ormandy kúzetýge arnalǵan shaǵyn mashinalar satyp alynǵanyn alǵa tartty.
– Aldaǵy 2023 jyly orman órtterin jedel óshirý úshin arnaiy jedel áreket etetý tobyn qurmaqshymyz. Sonymen qatar qol jetimdi jerler men órt bolǵan aýmaqtardy tazartyp, sol jerlerde ormandardy qalpyna keltirý jumystarymen ainalysatyn bolamyz, – dedi basqarma basshysy.
Jiyn barysynda tótenshe jaǵdailar qyzmetiniń ókilderi biyl Shyǵys Qazaqstan oblysynda oryn alǵan órtterge naizaǵai 75 paiyz, adami faktor 25 paiyz áser etkenin de aitty.
– Órttiń paida bolýyna negizinen naizaǵa jalyny áser etýde. Bul – tabiǵi úrdis bolǵandyqtan onyń aldyn alý múmkin emes. Sondyqtan ormandy órtten saqtaý úshin órt sóndirýshilerimiz kez kelgen ýaqytta shyqqan órtti aýyzdyqtaýǵa daiyn bolýy kerek. Sol sebepti bizder qazir órtti baqylaý isin kúsheitýdemiz. Biyldyń ózinde ǵaryshtyq monitoringtyń arqasynda 662 termonúkte anyqtalyp, órt oshaqtarynyń taralyp ketýine jol bermedik, – dedi tótenshe jaǵdailar qyzmetiniń ókilderi.
Brifingke qatysqanymyzda qazir óńirde 41 órtti sóndirý posttary jumys istep turǵanyn bildik.
– 2022 jyly órt sóndirý posttary óz betinshe 38 órtti óshirse, memlekettik órtke qarsy qyzmet mekemesimen tize qosyp 75 órt oshaǵyn óshirdi. Taǵy bir aita ketetin másele – búginde oblysymyzda 25 myńnan astam adam turatyn 40 eldi-mekende órt sóndirý postary bar. 2023-2025 jyldary aralyǵynda osyndai órt sóndirý posttarynyń sanyn taǵy 11-ge arttyrýdy kózdep otyrmyz, – dedi Nurjan Ómirjanov.
