2025 jylǵy 1 qyrkúiekten 31 jeltoqsanǵa deiin Shyǵys Qazaqstan oblysynda, elimizdiń ózge óńirlerindegi siiaqty, kúzgi áskerge shaqyrý naýqany ótedi. Bul týraly ShQO Qorǵanys isteri departamenti bastyǵynyń orynbasary Janibek Saparov ShQO Óńirlik kommýnikatsiialar qyzmetinde ótken brifingte málimdedi,- dep habarlaidy Dalanews.kz
«Áskeri qyzmet jáne áskeri qyzmetshilerdiń mártebesi týraly» zańǵa sáikes, merzimdi áskeri qyzmetke 18 ben 27 jas aralyǵyndaǵy, áskerge shaqyrýdy keiinge qaldyrýǵa nemese bosatylýǵa negizi joq er azamattar shaqyrylady. Áskerde qyzmet etý merzimi – 12 ai.
Biyl oblystan shamamen 800 jas ásker qataryna alynbaq. Naýqandy uiymdastyrý úshin 10 áskerge shaqyrý jáne meditsinalyq komissiia jumys isteidi. ShQO-dan shaqyrylǵan sarbazdar eldiń barlyq óńirlerinde qyzmet etedi.
Áskerge shaqyrylýshylardy habardar etý úderisi birtindep tsifrlyq formatqa kóshirilýde: shaqyrý pýnkterine kelý týraly eskertýler SMS arqyly jáne eGov portalynyń jeke kabineti arqyly jiberiledi. Meditsinalyq komissiiadan ádeii jaltarǵan nemese kelmegen azamattarǵa ákimshilik jáne qylmystyq jaýapkershilik qarastyrylǵan – aiyppuldan bastap bir jylǵa deiin bas bostandyǵynan aiyrýǵa deiin.
Sonymen qatar Qorǵanys ministrligi áskeri qyzmettiń tartymdylyǵyn arttyrý baǵytynda sharalar qabyldaýda. Áskerge shaqyrylýshylarǵa qyzmet ýaqytyna «nesie demalysy» beriledi, sondai-aq «Sarbaz 2.0» jobasyna qatysýǵa múmkindik bar. Eldiń 80-nen astam joǵary oqý ornymen jasalǵan kelisimderge sáikes, merzimdi áskeri qyzmetin abyroimen ótep, jaqsy nátije kórsetken jastardy ýniversitetter qosymsha emtihansyz tegin qabyldaidy.
Áskerge bólý barysynda bilim deńgeii, biliktiligi, otbasylyq jaǵdaiy, densaýlyǵy jáne jeke qalaý-tilekteri eskeriledi.
