2025 جىلعى 1 قىركۇيەكتەن 31 جەلتوقسانعا دەيىن شىعىس قازاقستان وبلىسىندا، ەلىمىزدىڭ وزگە وڭىرلەرىندەگى سياقتى، كۇزگى اسكەرگە شاقىرۋ ناۋقانى وتەدى. بۇل تۋرالى شقو قورعانىس ىستەرى دەپارتامەنتى باستىعىنىڭ ورىنباسارى جانيبەك ساپاروۆ شقو وڭىرلىك كوممۋنيكاسيالار قىزمەتىندە وتكەن بريفينگتە مالىمدەدى،- دەپ حابارلايدى Dalanews.kz
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا سايكەس، مەرزىمدى اسكەري قىزمەتكە 18 بەن 27 جاس ارالىعىنداعى، اسكەرگە شاقىرۋدى كەيىنگە قالدىرۋعا نەمەسە بوساتىلۋعا نەگىزى جوق ەر ازاماتتار شاقىرىلادى. اسكەردە قىزمەت ەتۋ مەرزىمى – 12 اي.
بيىل وبلىستان شامامەن 800 جاس اسكەر قاتارىنا الىنباق. ناۋقاندى ۇيىمداستىرۋ ءۇشىن 10 اسكەرگە شاقىرۋ جانە مەديسينالىق كوميسسيا جۇمىس ىستەيدى. شقو-دان شاقىرىلعان ساربازدار ەلدىڭ بارلىق وڭىرلەرىندە قىزمەت ەتەدى.
اسكەرگە شاقىرىلۋشىلاردى حاباردار ەتۋ ۇدەرىسى بىرتىندەپ سيفرلىق فورماتقا كوشىرىلۋدە: شاقىرۋ پۋنكتەرىنە كەلۋ تۋرالى ەسكەرتۋلەر SMS ارقىلى جانە eGov پورتالىنىڭ جەكە كابينەتى ارقىلى جىبەرىلەدى. مەديسينالىق كوميسسيادان ادەيى جالتارعان نەمەسە كەلمەگەن ازاماتتارعا اكىمشىلىك جانە قىلمىستىق جاۋاپكەرشىلىك قاراستىرىلعان – ايىپپۇلدان باستاپ ءبىر جىلعا دەيىن باس بوستاندىعىنان ايىرۋعا دەيىن.
سونىمەن قاتار قورعانىس مينيسترلىگى اسكەري قىزمەتتىڭ تارتىمدىلىعىن ارتتىرۋ باعىتىندا شارالار قابىلداۋدا. اسكەرگە شاقىرىلۋشىلارعا قىزمەت ۋاقىتىنا «نەسيە دەمالىسى» بەرىلەدى، سونداي-اق «سارباز 2.0» جوباسىنا قاتىسۋعا مۇمكىندىك بار. ەلدىڭ 80-نەن استام جوعارى وقۋ ورنىمەن جاسالعان كەلىسىمدەرگە سايكەس، مەرزىمدى اسكەري قىزمەتىن ابىرويمەن وتەپ، جاقسى ناتيجە كورسەتكەن جاستاردى ۋنيۆەرسيتەتتەر قوسىمشا ەمتيحانسىز تەگىن قابىلدايدى.
اسكەرگە ءبولۋ بارىسىندا ءبىلىم دەڭگەيى، بىلىكتىلىگى، وتباسىلىق جاعدايى، دەنساۋلىعى جانە جەكە قالاۋ-تىلەكتەرى ەسكەرىلەدى.
