Biyl óńirde jóndeý jumystaryna 25 milliard teńge bólindi. Onyń 8 milliard teńgesi jelilerdi jańǵyrtýǵa jumsaldy,- dep habarlaidy Dalanews.kz
Qazir shalǵai aýdandardaǵy qazandyqtar daiyn tur. Kómirmen qamtý máselesi de sheshildi.
"Degenmen, turǵyndar erte qamdanýǵa asyǵar emes", – deidi jaýaptylar. Mamandardyń aitýynsha, áleýmettik nysandar men turǵyn úilerdiń de ishki jelilerin jedel daiyndaý kerek. Qazir oblystaǵy 3 myńnan asa kópqabatty úilerdiń 65%-i ǵana qysqa daiyn.
"Avtonomdy qazandyqtar men turǵyn úi qory 15 tamyzǵa deiin tolyq daiyn bolýy tiis. 1 qazanǵa deiin kómir jetkizýshilermen ózara is-qimyl tetikterin pysyqtap, qajetti otyn kóleminiń kestege sáikes jetkizilýin qamtamasyz etý jáne ony temirjol tuiyqtarynda satý men tieý kezinde kezekke turý jaǵdailaryn boldyrmaý qajet", – dedi óńir basshysy Nurymbet Saqtaǵanov.
Ákimniń aitýynsha, barlyq qala men aýdandarda bul máselelerdi turaqty baqylaýda ustaityn arnaiy shtabtar jumys isteýde. Qazirgi tańda bilim berý nysandary kómirmen 93%, densaýlyq saqtaý – 81%, áleýmettik sala da – 81% qamtamasyz etilgen. Óskemende 1753 turǵyn úidiń 1053-i daiyndyq pasportyn alǵan.
Erekshe nazar Ridderge aýdarylýda: munda qazandyqtardyń daiyndyǵy ázirge 65%, alaida jylý jelilerin jóndeý kestege sai júrgizilýde.
"Barlyq jumystar 1 qyrkúiekke deiin aiaqtalýy tiis, sebebi Ridder – oblystyń eń sýyq aýdandarynyń biri jáne munda jylytý maýsymy erterek bastalýy múmkin", – dep atap ótti ákim.
