Qazaqstanda benzin óndirisi tómendedi, alaida bilik elde janarmai qory jetkilikti ekenin málimdedi, dep habarlaidy dalanews.kz.
2026 jyldyń qańtar-sáýir ailarynda benzin, onyń ishinde aviatsiialyq kerosin óndirisi 1,979 mln tonnany qurap, ótken jyldyń sáikes kezeńimen salystyrǵanda 5%-ǵa azaidy. 2025 jyldyń alǵashqy tórt aiynda bul kórsetkish 2,084 mln tonna bolǵan.
Sáýir aiynda óndiris kólemi tipti kúrt qysqaryp, naýryzdaǵy 553,2 myń tonnadan 365,4 myń tonnaǵa deiin tómendedi. Iaǵni bir ai ishinde óndiris 33,9%-ǵa azaiǵan.
Avtokólik benzininiń óndirisi de tómendegen. Biylǵy tórt aida 1,976 mln tonna benzin óndirilse, byltyr osy kezeńde 2,079 mln tonna shyǵarylǵan. Tómendeý 4,9%-dy qurady.
Osyǵan bailanysty premer-ministr Oljas Bektenov shekaradaǵy baqylaýdy kúsheitip, janarmai tapshylyǵyna jol bermeý úshin barlyq qajetti sharalardy qabyldaýdy tapsyrdy.
Úkimet málimetinshe, qazirgi ýaqytta eldegi benzin, dizel otyny jáne aviaotyn qory 1 mln tonnadan asady. Bul kólem ishki suranysty tolyq qamtamasyz etýge múmkindik beredi.
«Munai ónimderi birinshi kezekte janarmai quiý stantsiialaryna, aýyl sharýashylyǵy taýar óndirýshilerine jáne otandyq áýe tasymaldaýshylaryna jetkiziledi», – delingen habarlamada.
Qazir Energetika ministrliginiń buiryǵymen munai ónimderiniń jekelegen túrlerin avtokólikpen Qazaqstannan shyǵarýǵa tyiym salynǵan. Sonymen qatar temirjol arqyly jeńil distilliattardy eksporttaýǵa shekteý engizilip, avtokólikterdiń memlekettik shekarany táýligine bir retten artyq kesip ótýine shekteý qoiylǵan.
