Ońtústik Koreia Ýkraina maidanynda Resei jaǵynda soǵysqan jáne Ýkraina áskeriniń qolyna túsken Soltústik Koreia sarbazdaryn qabyldaýǵa daiyn ekenin málimdedi, dep habarlaidy dalanews.kz.
Seýldiń Syrtqy ister ministrligi áskeri tutqyndar óz erkimen Ońtústik Koreiaǵa kóshýdi qalasa, olardy qabyldap, qorǵaýǵa daiyn ekenin habarlady. Sonymen qatar, vedomstvo tutqyndardy olardyń kelisiminsiz Reseige nemese Soltústik Koreiaǵa qaitarýǵa qarsy ekenin málimdedi.
Ońtústik Koreia Konstitýtsiiasyna sáikes, Soltústik Koreia azamattary da Koreia Respýblikasynyń azamattary retinde qarastyrylady. Sondyqtan Pheniannan qashyp shyqqan azamattarǵa azamattyq berý tájiribesi burynnan bar. Sarapshylardyń aitýynsha, dál osy qaǵida Ýkrainadaǵy tutqyn sarbazdarǵa da qoldanylýy múmkin.
Buǵan deiin Ýkrainada ustalǵan eki soltústikkoreialyq áskeri qyzmetker Ońtústik Koreiaǵa barýǵa nietti ekenin bildirgen. Seýl men Kiev bul másele boiynsha birneshe aidan beri konsýltatsiialar júrgizip keledi.
Human Rights Watch uiymy olardyń Soltústik Koreiaǵa kúshtep qaitarylýy halyqaralyq quqyq normalaryn buzýy múmkin ekenin eskertken. Quqyq qorǵaýshylardyń pikirinshe, elge oralǵan jaǵdaida sarbazdardy azaptaý, májbúrli eńbekke jegý nemese tipti ólim jazasy kútýi yqtimal.
Ýkraina tarapynyń málimetinshe, Resei áskeri tutqyn almasý kezinde basqa sheteldik jaldamalylarǵa qyzyǵýshylyq tanytpaǵanymen, dál soltústikkoreialyq sarbazdardy qaitarý máselesin birneshe ret kótergen.
Sarapshylar bul qadam Seýldiń adam quqyqtaryn qorǵaý saiasatynyń jalǵasy ǵana emes, sondai-aq Koreia túbegindegi uzaq jyldar boiy jalǵasyp kele jatqan ideologiialyq teketirestiń jańa kórinisi ekenin aitady.
