Maloýbinka aýylynda oqýshylar arasynda 5 kúndik dalalyq áskeri oqý-jattyǵý ótken. Mamyr aiynyń 27-si men 31-i aralyǵynda bolǵan oqý-jattyǵýǵa aýdannyń barlyq mektepterindegi 5-10-shy synyptyń 137 oqýshysy qatysyp, 23 alǵashqy áskeri daiyndyq pániniń ustazy shaqyryldy. Sondai-aq, dene shynyqtyrý jattyǵýlaryn ótkizý maqsatynda Vinnoe jáne Bobrovka orta mektepteriniń dene shynyqtyrý pániniń ustazdary baǵyttalǵan.
– Dene shynyqtyrý pániniń eki ustazy 11 baladan qurylǵan topqa jetekshilik etti. 30-ynan 31-ine qaraǵan túnde ishimdik ishken qos ustaz balalarǵa álimjettik kórsetken. Oqýshylardyń biri bul týraly qaraýyl basshysyna habarlady, – dep habarlady ShQO Bilim basqarmasynyń baspasóz qyzmeti.
Balalar dáriger tekserisinen ótti. Olardyń densaýlyqtaryna eshqandai zaqym kelgen joq. Qazir barlyǵy ata-analaryna tabystaldy.
– Atalmysh faktige bailanysty oblystyq bilim basqarmasy, aýdandyq bilim bólimi, quqyq qorǵaý organdarynyń qyzmetkerleri tarapynan arnaiy komissiia qurylyp, tekserý jumystary bastalyp ketti. Óreskel zańbuzýshylyqqa jol bergen eki azamat aýdandyq politsiia bólimine jetkizildi. Tergeý amaldary júrgizilip jatyr, – delingen málimette.
Sondai-aq, dalalyq áskeri oqý-jattyǵýyna baǵyttalǵan barlyq alǵashqy áskeri daiarlyq pániniń ustazdaryna qatysty óz mindetterin qajetti deńgeide atqarmai, balalardyń qaýipsizdigin qamtamasyz etpegenderi úshin tártiptik shara qoldanylmaq.
