مالوۋبينكا اۋىلىندا وقۋشىلار اراسىندا 5 كۇندىك دالالىق اسكەري وقۋ-جاتتىعۋ وتكەن. مامىر ايىنىڭ 27ء-سى مەن 31ء-ى ارالىعىندا بولعان وقۋ-جاتتىعۋعا اۋداننىڭ بارلىق مەكتەپتەرىندەگى 5-10-شى سىنىپتىڭ 137 وقۋشىسى قاتىسىپ، 23 العاشقى اسكەري دايىندىق ءپانىنىڭ ۇستازى شاقىرىلدى. سونداي-اق، دەنە شىنىقتىرۋ جاتتىعۋلارىن وتكىزۋ ماقساتىندا ۆيننوە جانە بوبروۆكا ورتا مەكتەپتەرىنىڭ دەنە شىنىقتىرۋ ءپانىنىڭ ۇستازدارى باعىتتالعان.
– دەنە شىنىقتىرۋ ءپانىنىڭ ەكى ۇستازى 11 بالادان قۇرىلعان توپقا جەتەكشىلىك ەتتى. 30-ىنان 31-ىنە قاراعان تۇندە ىشىمدىك ىشكەن قوس ۇستاز بالالارعا الىمجەتتىك كورسەتكەن. وقۋشىلاردىڭ ءبىرى بۇل تۋرالى قاراۋىل باسشىسىنا حابارلادى، – دەپ حابارلادى شقو ءبىلىم باسقارماسىنىڭ باسپا ءسوز قىزمەتى.
بالالار دارىگەر تەكسەرىسىنەن ءوتتى. ولاردىڭ دەنساۋلىقتارىنا ەشقانداي زاقىم كەلگەن جوق. ءقازىر بارلىعى اتا-انالارىنا تابىستالدى.
– اتالمىش فاكتىگە بايلانىستى وبلىستىق ءبىلىم باسقارماسى، اۋداندىق ءبىلىم ءبولىمى، قۇقىق قورعاۋ ورگاندارىنىڭ قىزمەتكەرلەرى تاراپىنان ارنايى كوميسسيا قۇرىلىپ، تەكسەرۋ جۇمىستارى باستالىپ كەتتى. ورەسكەل زاڭبۇزۋشىلىققا جول بەرگەن ەكى ازامات اۋداندىق پوليسيا بولىمىنە جەتكىزىلدى. تەرگەۋ امالدارى جۇرگىزىلىپ جاتىر، – دەلىنگەن مالىمەتتە.
سونداي-اق، دالالىق اسكەري وقۋ-جاتتىعۋىنا باعىتتالعان بارلىق العاشقى اسكەري دايارلىق ءپانىنىڭ ۇستازدارىنا قاتىستى ءوز مىندەتتەرىن قاجەتتى دەڭگەيدە اتقارماي، بالالاردىڭ قاۋىپسىزدىگىن قامتاماسىز ەتپەگەندەرى ءۇشىن تارتىپتىك شارا قولدانىلماق.
