Bıyl kóktemgi egis jumystaryn júrgizýge oblystyq búdjetten 4,1 mlrd teńge sýbsıdıa bólý kózdelip otyr, dep habarlaıdy Dalanews.kz. 

Atap aıtsaq, tuqym sharýashylyǵyn qoldaýǵa 1 mlrd 121 mln teńge, mıneraldyq tyńaıtqyshtardyń qunyn arzandatýǵa 1 mlrd 651 mln teńge, pestısıdter qunyn arzandatýǵa 1 mlrd 301 mln teńge, sýarý sýyn jetkizý qunyn arzandatýǵa 16 mln teńge qaralǵan.
SHQO aýyl sharýashylyǵy basqarmasy basshysynyń mindetin atqarýshy Ajar Qajybekovanyń aıtýynsha, jergilikti jáne respýblıkalyq búdjet esebinen mıneraldyq tyńaıtqyshtar men pestısıdterdi sýbsıdıalaýǵa qosymsha qajettilik boıynsha 1,1 mlrd teńgege búdjettik ótinimder joldandy.

Sondaı-aq kóktemgi dala jumystaryn júrgizý úshin «Agrarlyq nesıe korporasıasy» AQ SHQF arqyly kredıtteýge shamamen 3 mlrd teńge bólindi («Keń dala» baǵdarlamasy boıynsha 1,5 mlrd teńge, «Agrobıznes» baǵdarlamasy boıynsha 1,5 mlrd teńge).
Jyl basynan beri «Keń dala» baǵdarlamasy boıynsha 1,5 mlrd teńgege 22 sharýashylyq, «Agrobıznes» baǵdarlamasy boıynsha 1,1 mlrd teńgege 22 sharýashylyq qarjylandyryldy.
Sonymen qatar «QazAgroQarjy» AQ SHQF tehnıka men qural-jabdyqtar lızıńine 3 mlrd teńge qarastyrdy. Jyl basynan 2,9 mlrd teńgege 96 aýyl sharýashylyǵy tehnıkasyn satyp alýǵa sharttar jasaldy.
Barlyq nesıe sýbsıdıalaýdy eskere otyryp jyldyq 6%-dan aspaıtyn mólsherde beriledi.