Astanada bolǵan qaiǵyly jol apatynan keiin bloger Nurbolat Azilov aýyr júk kólikterine qatysty talapty kúsheitýdi surady. Ol mikser men KamAZ júrgizýshileriniń jyldamdyqty jii asyratynyn aityp, politsiia departamentine úndeý jasady, dep habarlaidy dalanews.kz.
Aitýynsha, mundai kólikterdiń júrgizýshileri kóbine ýaqytpen jumys isteitindikten, asyǵys júredi. Blogerdiń sózinshe, ásirese mikser men aýyr júk kólikteri qala ishinde jeńil kólik sekildi jyldam qozǵalyp, qaýipti jaǵdai týǵyzady.
“Keshe ǵana qaiǵyly jaǵdai boldy. Balalardyń ómiri bárimiz úshin mańyzdy. Astanada aýyr júk kólikteri óte qatty júredi. Keide avtobýs jolaǵymen de ozyp ótetinin kóremiz. Osyndai asyǵystyqtyń saldarynan jol-kólik oqiǵalary kóbeiip jatyr”, – dedi ol.
Sondai-aq Azilov qaladaǵy barlyq aýyr júk kólikterine saǵatyna 40 shaqyrym jyldamdyq shekteýin engizýdi usyndy. Onyń pikirinshe, belgilengen talapty óreskel buzǵan júrgizýshilerge qatań jaza qoldaný qajet.
Bloger aýyr tehnikany tájiribeli ári tártip saqtaityn júrgizýshilerge ǵana senip tapsyrý keregin aitty. Sonymen qatar ata-analardy balalarǵa jol qaýipsizdigi týraly jii eskertý jasaýǵa shaqyrdy.
“Balalar jaiaý júrginshiler jolaǵynan asyqpai ótsin. Bir sáttik nemqurailylyq orny tolmas qaiǵyǵa ákelýi múmkin”, – dedi ol.
