Shyǵys Qazaqstan oblysyndaǵy 40 jyldan astam ýaqyt jóndeý kórmegen burynǵy №1 qalalyq aýrýhananyń ǵimaraty tolyq jańǵyrtýdan ótýde,- dep habarlaidy Dalanews.kz
Qazir bul mekeme Shyǵys Qazaqstan oblystyq mamandandyrylǵan meditsinalyq ortalyǵy (ShQO MMO) dep atalady. Halyq arasynda áli kúnge «1-qalalyq aýrýhana» dep atalatyn ortalyq burynnan synǵa ilinip kele jatyr.
Birneshe ret «jóndeý jumystary bastalady» dep aitylǵanymen, tek jekelegen bólmelerdi jóndeýmen shektelip keldi. Keńestik stildegi tar palatalar, eski tozyǵy jetken jabdyqtar – munyń bári turǵyndar úshin úirenshikti kóriniske ainalǵan edi. Naǵyz kúrdeli jóndeý qajet bolatyn.
Búginde aýrýhananyń barlyq derlik júieleri - jeldetý júiesinen bastap, palatalardaǵy shaqyrý batyrmalaryna deiin jańartylyp jatyr.
– Jóndeý jumystary byltyrǵy mamyrda oblys ákimi mekemege arnaiy kelip, jaǵdaimen egjei-tegjeili tanysqannan keiin ǵana bastaldy. Sodan soń elektr júiesin, jeldetýdi jáne injenerlik kommýnikatsiialardy aýystyrýǵa qarajat bólindi. Qazir «Qaztsink» kompaniiasynyń qoldaýymen ginekologiia bólimi jóndelip jatyr. Eki aptadan keiin patsientter jańa palatalarǵa kóshedi. Sonymen qatar aýrýhana aýmaǵy da abattandyrylyp jatyr. Jalpy, barlyq bólimsheler kezeń-kezeńimen jańartylady, – deidi ShQO MMO bas dárigeri Sholpan Makasheva.
Jóndeý jumystarynyń jalpy uzaqtyǵy – segiz ai. Aiaqtalý merzimi – 2026 jyl.
– Ǵimarattyń eski jeldetý júiesi tolyq aýystyryldy. Buryn aýa ainalymy durys bolmaǵan. Endi palatalarǵa dárethanalar ornattyq – bul naýqastarǵa barynsha qolaily jaǵdai jasaý úshin qajet boldy. Bul jumystar 90% aiaqtaldy, 30 maýsymǵa deiin tolyq tapsyrylady, – deidi qurylys ýchaskesiniń bastyǵy Amangeldi Sembinov.
Aýrýhananyń qabyldaý bólimine kúnine 200-ge jýyq adam júginedi. Degenmen olar áli de tar dálizder men eski bólmelerde otyr. Endi bul bólim de kúrdeli ózgeriske ushyraidy, jáne bul joly biýdjet esebinen emes, jeke investitsiia esebinen. Investitsiia kólemi – 1 milliard teńgeden asady.
– Qazirgi qabyldaý bóliminiń aýdany – 350 sharshy metr, bul sanitarlyq talaptarǵa sai emes. Bolashaqta respýblikalyq nefrologiialyq ortalyq – «BB Nura» JShS qoldaýymen jeke ǵimarat salynady. Onyń aýdany shamamen 1000 sharshy metr bolady. Birinshi qabatta – qabyldaý-diagnostikalyq bólim, ekinshi qabatta – gemodializ tósekteri bar nefrologiia bólimi ornalaspaq, – deidi bas dárigerdiń orynbasary Marat Nurbikenov.
Qalalyqtar da qazirgi ózgeristerge túsinistikpen qarai bastady.
– Kez kelgen jóndeý ýaqyt pen qarajatty qajet etedi. Al bul – aýrýhana, jóndeý jumystaryna qaramastan kúndelikti jumysyn toqtatqan joq. Qarapaiym adam retinde men meditsina qyzmetkerleriniń jaqsy kútimi men jyly qabaq tanytqandaryna rizamyn, – deidi qala turǵyny Albina Zagornova.
Turǵyndar talai jyldar kútken jóndeý jumystary aqyry júzege asyp jatyr. Jergilikti atqarýshy organdardyń bastamasy men seriktesterdiń qoldaýynyń arqasynda burynǵy №1 qalalyq aýrýhana tek syrttai emes, mazmundyq turǵydan da jańaryp, qazirgi zaman talabyna sai meditsinalyq mekemege ainalýda. Endi munda emdelýshige degen qamqorlyq jaily palatadan bastalyp, sapaly meditsinalyq kómekpen aiaqtalady.
