Shyǵys Qazaqstan oblysynyń ákimi Nurymbet Saqtaǵanov Ulan aýdany Asýbulaq aýylyndaǵy sý qubyry júiesin qaita jańartý jumystarynyń barysymen tanysty.
Joba aiasynda uzyndyǵy 46 shaqyrymǵa jýyq sý qubyry jelileri salynady. Bul 524 jeke úidi, 1700-den astam turǵyndy jáne 12 áleýmettik nysandy sapaly aýyzsýmen qamtamasyz etýge múmkindik beredi. Sondai-aq, árqaisysynyń kólemi 200 tekshe metr bolatyn eki taza sý rezervýary, eki sorǵy stantsiiasy, elektr jelileri men rezervtik qorektendirý júiesi ornatylady. Apattyq jaǵdaida dizel generatory qarastyrylǵan. Barlyq jabdyq Germaniiada óndirilgen. Nysan aýmaǵy jaryqtandyrylyp, qorshalyp, beinebaqylaý júiesimen jabdyqtalady.
– Barlyq jumysty sýyq túspei turyp aiaqtaý kerek. Bul Asýbulaq turǵyndaryn ýaqytynda sapaly aýyzsýmen qamtýǵa múmkindik beredi. Biraq eń bastysy – adamdardyń qaýipsizdigi. Eshbir jumys adamnyń ómiri men densaýlyǵynan mańyzdy emes. Biz eshqashan merzim úshin táýekelge bara almaimyz, – dedi Nurymbet Saqtaǵanov.
Óńir basshysy qaýipsizdik talaptaryn qatań saqtaý kerektigin erekshe atap ótti. Bul, ásirese, Bozanbai aýylyndaǵy basqa bir nysanda bolǵan qaiǵyly oqiǵaǵa bailanysty mańyzdy. Ákim merdiger uiymdarǵa baqylaýdy kúsheitýdi, al tehnikalyq jáne avtorlyq qadaǵalaý qyzmetterine zań buzýshylyqtarǵa jol bermeýdi tapsyrdy.
Qazirgi ýaqytta qurylys alańynda barlyq qajetti tehnika jumyldyrylǵan: ekskavatorlar, tiegishter, samosvaldar, KamAZdar jáne ózge de arnaiy tehnikalar. Burǵylaý jumystary aiaqtalyp, qubyr jelileriniń alǵashqy ýchaskeleri tóselip, qudyqtar ornatylǵan. Sondai-aq, sorǵy stantsiialary men rezervýarlarǵa arnalǵan alańdar daiyndalýda.
Bas merdiger — «KIT-Holding» JShS, avtorlyq qadaǵalaýdy — «Kazgrajdanstroiproekt» JShS, al tehnikalyq qadaǵalaýdy «Spetsstroitehmontaj-PV» JShS júzege asyrýda.
Oblys ákimi jumys barysyna oń baǵa berip, basty nazarda ustalatyn baǵyt retinde jalǵyzbasty zeinetkerler men áleýmettik osal toptarǵa sý júiesine qosylýǵa kómektesý qajettigin atap ótti. Nysan tolyq qarjylandyrylǵan.
Sý júiesin iske qosý qurylys maýsymy aiaqtalǵanǵa deiin josparlanyp otyr.
