Shyǵys Qazaqstan oblysynyń ákimi Nurymbet Saqtaǵanov keshe bolǵan qaiǵyly oqiǵaǵa bailanysty shuǵyl túrde Úlken Naryn aýdanyna bardy, dep habarlaidy Dalanews.kz
Úlken Naryn aýylynda sý qubyry jarylǵan jerde apatty qalpyna keltirý jáne jer qazý jumystary kezinde topyraq opyrylyp, «Naryn KomHoz Servis» kommýnaldyq kásipornynyń eki qyzmetkeri — dánekerleýshi Erjan Aitpaev (1983 jyly týǵan) jáne slesar Sergei Kasterin (1970 jyly týǵan) qaza tapty.
Oqiǵa ornynda oblys ákimi arnaiy komissiia múshelerine óndiristik jáne eńbek qaýipsizdigin qamtamasyz etýge qatysty qoldanystaǵy reglamentterdi túbegeili qaita qaraý qajettigin atap ótti.
— Beibit, turaqty ýaqytta óndiristik qaýipsizdik talaptarynyń buzylýynan adam óliminiń oryn alýy múlde jol berilmeitin jaǵdai. Qyzmetkerlerdiń ómiri men densaýlyǵy kez kelgen kásiporyn úshin eń joǵary basymdyqta bolýy tiis — bul kez kelgen ekonomikalyq múddeden mańyzdy. Ákimdik atynan qaza tapqandardyń otbasylaryna shyn júrekten kóńil aityp, biz olarǵa jan-jaqty qoldaý kórsetetinimizdi jetkizgim keledi. Sonymen qatar, tiisti organdarǵa oqiǵanyń sebepterin anyqtap, oǵan kináli adamdardyń jaýapkershiligin belgileý úshin jan-jaqty ári ádil tekserý júrgizýdi tapsyrdym, — dedi Nurymbet Saqtaǵanov.
Oqiǵany tergeitin komissiianyń tóraǵasy — Shyǵys Qazaqstan oblysynyń bas eńbek inspektory Baqytbek Qizatovtyń aitýynsha, aldaǵy on kún ishinde oqiǵaǵa bailanysty jan-jaqty tergeý júrgiziledi. Qajet bolǵan jaǵdaida tergeý merzimi 30 kúnge deiin uzartylyp, salalyq sarapshylar tartylatyn bolady. Qorytyndy materialdar quqyq qorǵaý organdaryna jáne sot instantsiialaryna beriledi.
Oblys ákimi óndiristik jaraqattardyń aldyn alý máselelerine keshendi túrde qaraý qajettigin erekshe atap ótip, ásirese adamdardyń ómirine qaýip tóndiretin jaǵdailarda eńbek qaýipsizdigi men eńbekti qorǵaý oblys basshylyǵynyń turaqty baqylaýynda bolatynyn jetkizdi.
Qaza tapqandardyń otbasylaryna respýblikalyq biýdjetten ótemaqy tólenedi, sondai-aq saqtandyrý tetikteri arqyly qarastyrylǵan ótemaqylar beriledi. Óńir basshysy marqumdardyń týystarymen jeke kezdesip, olardyń nazardan tys qalmaitynyn jáne olarǵa tiisti kómek kórsetiletinin aitty.
