شىعىس قازاقستان وبلىسىنىڭ اكىمى نۇرىمبەت ساقتاعانوۆ كەشە بولعان قايعىلى وقيعاعا بايلانىستى شۇعىل تۇردە ۇلكەن نارىن اۋدانىنا باردى، دەپ حابارلايدى Dalanews.kz
ۇلكەن نارىن اۋىلىندا سۋ قۇبىرى جارىلعان جەردە اپاتتى قالپىنا كەلتىرۋ جانە جەر قازۋ جۇمىستارى كەزىندە توپىراق وپىرىلىپ، «نارىن كومحوز سەرۆيس» كوممۋنالدىق كاسىپورنىنىڭ ەكى قىزمەتكەرى — دانەكەرلەۋشى ەرجان ايتپايەۆ (1983 جىلى تۋعان) جانە سلەسار سەرگەي كاستەرين (1970 جىلى تۋعان) قازا تاپتى.
وقيعا ورنىندا وبلىس اكىمى ارنايى كوميسسيا مۇشەلەرىنە وندىرىستىك جانە ەڭبەك قاۋىپسىزدىگىن قامتاماسىز ەتۋگە قاتىستى قولدانىستاعى رەگلامەنتتەردى تۇبەگەيلى قايتا قاراۋ قاجەتتىگىن اتاپ ءوتتى.
— بەيبىت، تۇراقتى ۋاقىتتا وندىرىستىك قاۋىپسىزدىك تالاپتارىنىڭ بۇزىلۋىنان ادام ءولىمىنىڭ ورىن الۋى مۇلدە جول بەرىلمەيتىن جاعداي. قىزمەتكەرلەردىڭ ءومىرى مەن دەنساۋلىعى كەز كەلگەن كاسىپورىن ءۇشىن ەڭ جوعارى باسىمدىقتا بولۋى ءتيىس — بۇل كەز كەلگەن ەكونوميكالىق مۇددەدەن ماڭىزدى. اكىمدىك اتىنان قازا تاپقانداردىڭ وتباسىلارىنا شىن جۇرەكتەن كوڭىل ايتىپ، ءبىز ولارعا جان-جاقتى قولداۋ كورسەتەتىنىمىزدى جەتكىزگىم كەلەدى. سونىمەن قاتار، ءتيىستى ورگاندارعا وقيعانىڭ سەبەپتەرىن انىقتاپ، وعان كىنالى ادامداردىڭ جاۋاپكەرشىلىگىن بەلگىلەۋ ءۇشىن جان-جاقتى ءارى ءادىل تەكسەرۋ جۇرگىزۋدى تاپسىردىم، — دەدى نۇرىمبەت ساقتاعانوۆ.
وقيعانى تەرگەيتىن كوميسسيانىڭ ءتوراعاسى — شىعىس قازاقستان وبلىسىنىڭ باس ەڭبەك ينسپەكتورى باقىتبەك قيزاتوۆتىڭ ايتۋىنشا، الداعى ون كۇن ىشىندە وقيعاعا بايلانىستى جان-جاقتى تەرگەۋ جۇرگىزىلەدى. قاجەت بولعان جاعدايدا تەرگەۋ مەرزىمى 30 كۇنگە دەيىن ۇزارتىلىپ، سالالىق ساراپشىلار تارتىلاتىن بولادى. قورىتىندى ماتەريالدار قۇقىق قورعاۋ ورگاندارىنا جانە سوت ينستانسيالارىنا بەرىلەدى.
وبلىس اكىمى وندىرىستىك جاراقاتتاردىڭ الدىن الۋ ماسەلەلەرىنە كەشەندى تۇردە قاراۋ قاجەتتىگىن ەرەكشە اتاپ ءوتىپ، اسىرەسە ادامداردىڭ ومىرىنە ءقاۋىپ توندىرەتىن جاعدايلاردا ەڭبەك قاۋىپسىزدىگى مەن ەڭبەكتى قورعاۋ وبلىس باسشىلىعىنىڭ تۇراقتى باقىلاۋىندا بولاتىنىن جەتكىزدى.
قازا تاپقانداردىڭ وتباسىلارىنا رەسپۋبليكالىق بيۋدجەتتەن وتەماقى تولەنەدى، سونداي-اق ساقتاندىرۋ تەتىكتەرى ارقىلى قاراستىرىلعان وتەماقىلار بەرىلەدى. ءوڭىر باسشىسى مارقۇمداردىڭ تۋىستارىمەن جەكە كەزدەسىپ، ولاردىڭ نازاردان تىس قالمايتىنىن جانە ولارعا ءتيىستى كومەك كورسەتىلەتىنىن ايتتى.
