Ákim ishke kirýden bes minýt buryn aiaq astynan «tazalaý» sharasy bastaldy. Aldymen aqjaǵalynyń shabarmandary zalǵa alaq-julaq etip kirdi. Óń-túsine qarasańyz, beine janalǵysh siiaqty: kórdei qarańǵy, tastai sýyq. Ishti kózimen sholyp, tesik-tesikke deiin tintip jatyr. Biz álgi eki shabarmannyń qylyǵyn túsinbei qarap turmyz. Sonan soń «tintý» jumystaryn bitirgen olar syrttaǵylarǵa habar berdi. Sol-aq eken esikten qap-qara kastiým-shalbar kigen úsh-tórteý saý ete qaldy. Sonda ǵana túsindik. Ákim kele jatyr eken...
Nege ekenin bilmeimin, sol sátte ákimdi qatty aiap kettim. Qasyndaǵy «janalǵyshtar» joldy «tazalap», biz siiaqty tiri ákimniń qolyn ustaǵysy keletin jigitterdi qidai sypyryp, kókemizdi eshkimmen amandastyrmai, sahnaǵa qarai súirep barady. Ákim baiqus tilshilermen júzbe júz jolyǵyp, bir-eki aýyz tildeskisi keldi-aý deimin. Bizge qiyla qarap, uzatylǵan qyzdai amalsyz ketip barady. ..
Áńgime sonymen tynǵan joq. Ákim sahnadan túserde de qyzyq boldy. Álgi sholaq belsendiler taǵy da abyr-sabyr bolyp ketti. Bireýi kókemizdiń sahnadan aman-esen túskenine kóz jetkizý úshin ústi-basyn bir syipap shyqty (anyǵy – alaqanymen kastiýmine qonǵan qyl-qybyrdy aqyryn qaǵyp jatyr). Ekinshisi jol «arshyp» álek. Úshinshisi kamera kótergen operatorlardyń jaryǵyn jaýyp jatqany. Tórtinshisi shyǵaberistegi esikti aiqara ashyp tur.
Ákim kókem bizdiń tustan óte bergende, bir sylbyr tilshiniń qaǵaz-qalamy jerge túsip ketkeni. Sony álgi saqqulaqtyń bireýi baiqap qalypty. Ushqan qustai keldi de jerdegi bir japyraq qaǵaz ben qalamsapty bomba kórgendei, asa tez jyldamdyqpen, asa saqtyqpen kóterip aldy. Sóitti de qasymda turǵan tilshige qadalyp turyp: «Mynaǵan ákim taiyp jyǵylsa, qaitesiń. Osy úshin jaýap beresiń. Senimen keiin sóilesemiz» - dep surlanyp ketti.
–Mynalar jan ala ma? - deidi esi shyqqan álgi áriptesim.
–Bastyǵyna jan kerek bolsa... alýy múmkin, – dedim sybyrlap.
