Shókeev balalar úiine baryp, ujym men tárbielenýshilerdi merekmen quttyqtady
Halyqaralyq áielder kúni qarsańynda Túrkistan oblysy ákimi Ómirzaq Shókeev Arys qalalyq balalar úiiniń ujymy men tárbielenýshilerin quttyqtap, syilyq jasady. Otbasy úlgisindegi ortalyqtyń balalary oblys basshysymen Arys oqiǵasy kezinen jaqsy tanys. Apatty oqiǵa oryn alǵanda Ómirzaq Estaiuly eń alǵash bolyp osy balalar úiine kelgen. Syn saǵatta jandarynan tabylǵan aimaq basshysyn qýanyshpen qarsy alǵan balǵyndar balalar úiiniń barlyq bólmelerin birge aralap shyqty.
Ózderine arnaiy kelgen meimandarǵa arnap ónerlerin ortaǵa saldy. Óleń-jyrlaryn oqyp, anaǵa degen sarqylmas saǵynyshtan týǵan ánderin shyrqady.
Balalar aýylyndaǵy árbir búldirshin oblystaǵy birneshe basqarma basshylarynyń jiti nazarynda. Olarmen birge óńirdiń tarihi-mádeni ortalyqtary men demalys oryndaryna ekskýrsiialar turaqty túrde ótkizilip turady. Jaqynda Qostanaida julqa kóterýden ótken respýblika chempionatynda 120 keli salmaqty baǵyndyryp, altyn júlde iegeri atanǵan Diana Hakimova da osy shańyraqtyń tárbielenýshisi. Bolashaq olimpiada chempiony bolýdy armandaidy.
Qara shańyraqta búginde 60-tan astam bala ósip jatyr. Olardyń ár qaisysy túrli ulttan bolǵanymen barlyǵy bir tilde iaǵni, qazaq tilinde sóileidi. Birneshe tildi meńgergen balalar týǵan ata-ana qamqorynan qaǵylǵanmen, bul ortalyqta arnaiy otbasylyq negizde tárbielenedi. Munda januia músheleri jasaqtalyp, anasy men balasy júiesi qolǵa alynǵan. 7 birdei otbasyna bólingen balalar úiinde olardyń tolyqqandy ómir súrýine bar jaǵdai jasalǵan. Olardyń jeke bólmeleri, kompiýterlik synyptar, sporttyq bólmeler bar.
Oblys basshysy osydan 98 jyl buryn qyzmetin bastaǵan Tólegen Tájibaev atyndaǵy balalar úiinde ashylǵan murajai jumysymen tanysty. Búginge deiin osy uiadan ushqan úsh myńǵa jýyq tárbielenýshi ómirden óz ornyn tapqan. Otbasy úlgisindegi balalar úiinen búginge deiin ataqty ǵalymdar men jazýshylar, ult maqtanyshyna ainalǵan batyrlar, belgili qoǵam qairatkerleri men Keńes odaǵynyń batyrlary Beisen Ońtaev, Sadyq Ismailov, Bergen Isahanov, Naǵi Iliiasov, Ivan Jýrbalar ushsa, qazaqtyń belgili jazýshysy, satirik, dramatýrg Sadyqbek Adambekov pen esimi berilgen Tólegen Tájibaev ta osynda tárbielengen.
Túrkistan oblysy ákiminiń baspasóz qyzmeti
