Túrli óner adamdarynyń basyn qosatyn mádenı demalys orny endi qaladaǵy Qoshqar ata boıy men Beket batyr, Asqarov jáne Beıbitshilik kósheleri boıynda ornalaspaq. Búginde arbattyń jobasy jasalynyp, aımaq basshysyna usynylǵan. Sonymen qatar, búgingi jumysshy top quramyndaǵy oblys máslıhatynyń depýtaty Ó.Meldehanov atalǵan joba boıynsha óziniń birqatar usynystaryn jetkizdi.
Aıta keteıik, mundaı ashyq aspan astyndaǵy kórmeni qolǵa alý ıdeıasyn óńir basshysy J.Túımebaev kóterip, ony júzege asyrýdy qala ákimdigine tapsyrǵan bolatyn. Osylaısha, taıaý kúnderi qala ortalyǵynan Shymkenttiń óz «Arbaty» paıda bolyp, onda shahar turǵyndary men qonaqtary jeksenbi jáne mereke kúnderi sýretshilerdiń kórmesin, kádesyılardyń alýan túrlerin tamashalaı alatyn bolady.
Aralaý barysynda oblys ákimi atalǵan kóshe boıyndaǵy turǵyndarmen tildesip, sol kóshe boıynda ornalasqan dámhanalardyń birinde kelýshilermen kofe ústinde, «Arbat» demalys orny týraly pikirlesti. Sondaı-aq ákim bul jobany júzege asyrýdyń basty maqsaty ulttyq qundylyqtardy dáripteı otyryp, turǵyndardyń qazaq halqynyń dástúri men tarıhyna degen qyzyǵýshylyǵyn oıatý ekenin atap ótti.
OQO ákiminiń baspasóz qyzmeti
