Shymkent qalasynyń ákimi Ǵabit Syzdyqbekov qalany aýyz sýmen qamtý kásipornyn memleket menshigine qaitarýdy qolǵa aldy. Al ol kompaniia búginde bir kezderi qalanyń ákimi bolǵan Anarbek Ormannyń menshigi sanalady.
Bul iske belgili quqyq qorǵaýshy Jániia Bodaý da aralasa bastady. Ol keshe áleýmettik jelige arnaiy post jariialap, Shymkent qalasyna kelgenin aitty.
Advokattyń jazbasynan uqqanymyz, 1997 jyly jekeniń qolyna ótip ketken aýyz sý júiesinen jemqorlyqtyń iisi ańqityndai. Iaǵni strategiialyq mańyzdy nysan turǵyndardyń múddesinen góri, óz qaltasynyń qamyn kóbirek oilaityn jekeniń qolyna ótken. 1997 jyly Shymkentti basqarǵan A.Orman zańdy belshesinen basyp, qalanyń aýyz sý sharýashylyǵy nysandaryn óziniń senimdi adamdaryna ótkizip jibergen.
Aldymen ol 1996-1997 jyldary saý turǵan sý júieleri mekemesin bólshektep, birneshe kásiporyn qurady. Al sol kezdegi múlikti jekeshelendirýge salynǵan tyiymǵa qaramastan olardy jekeniń qolyna ótkizip jiberedi.
Artynsha bul kompaniialar A.Ormannyń yqpalyndaǵy zańdy tulǵaǵa satylyp ketedi. Nebári 17 333 000 teńgege. Sóitip bul aýyz sý kompaniialary A.Ormannyń menshigindegi «Vodnye resýrsy-Marketing» JShS-ne baryp qosylady. Bul joly 41 027 000 teńgege baǵalanǵan. Sonda kezinde tutas bir qalanyń sý júiesin 17 333 000 teńgege qalai satyp jibergen degen suraq týady.
Qysqasy búginde bul JShS qaryzǵa da belshesinen batqan, tarifi de el boiynsha joǵary kórinedi. Aýyz sý sapasy da syn kótermeidi.
Osylardy eskergen qala ákimi aýyz sý júiesin memleket menshigine qaitarý arqyly tarifterdi júielep, sýdyń sapasyn da jaqsartýdy kózdep otyr. Al eks-ákim de qarap qalmai, kompaniiany qalaida qaitarmaýdyń qamyna kirisken.
Ǵ.Syzdyqbekov te Jániia Bodaýdyń postyn bólisip, ózi de Feisbýkke jazba qaldyrdy. Onda qala ákimi strategiialyq nysandardy memleket menshigine qaitarý – memlekettik mańyzy bar másele ekenni atap ótken.
«Biz bul jumysty Prezident tapsyrmasy aiasynda júrgizip jatyrmyz. Meniń ustanymym ózgermeidi: qala ómiri úshin mańyzdy nysandar memlekettiń baqylaýynda bolýy tiis. Bul basqarýdyń ashyqtyǵyn qamtamasyz etý, halyqqa qyzmet kórsetýdi úzdiksiz júrgizý jáne qala turǵyndarynyń múddesin qorǵaý úshin qajet. Osy baǵyttaǵy jumysty turǵyndardyń múddesin basshylyqqa ala otyryp ári qarai da jalǵastyramyz», dedi Ǵ.Syzdyqbekov áleýmettik jelide.
Sondai-aq ol quqyqtyq memlekette ómir súrip jatqandyqtan, bul máselege sońǵy núkteni sot qoiatynyn jetkizdi.
