شىمكەنت قالاسىنىڭ اكىمى عابيت سىزدىقبەكوۆ قالانى اۋىز سۋمەن قامتۋ كاسىپورنىن مەملەكەت مەنشىگىنە قايتارۋدى قولعا الدى. ال ول كومپانيا بۇگىندە ءبىر كەزدەرى قالانىڭ اكىمى بولعان اناربەك ورماننىڭ مەنشىگى سانالادى.

بۇل ىسكە بەلگىلى قۇقىق قورعاۋشى ءجانيا بوداۋ دا ارالاسا باستادى. ول كەشە الەۋمەتتىك جەلىگە ارنايى پوست جاريالاپ، شىمكەنت قالاسىنا كەلگەنىن ايتتى.

ادۆوكاتتىڭ جازباسىنان ۇققانىمىز، 1997 جىلى جەكەنىڭ قولىنا ءوتىپ كەتكەن اۋىز سۋ جۇيەسىنەن جەمقورلىقتىڭ ءيىسى اڭقيتىنداي. ياعني ستراتەگيالىق ماڭىزدى نىسان تۇرعىنداردىڭ مۇددەسىنەن گورى، ءوز قالتاسىنىڭ قامىن كوبىرەك ويلايتىن جەكەنىڭ قولىنا وتكەن. 1997 جىلى شىمكەنتتى باسقارعان ا.ورمان زاڭدى بەلشەسىنەن باسىپ، قالانىڭ اۋىز سۋ شارۋاشىلىعى نىساندارىن ءوزىنىڭ سەنىمدى ادامدارىنا وتكىزىپ جىبەرگەن.

الدىمەن ول 1996-1997 جىلدارى ساۋ تۇرعان سۋ جۇيەلەرى مەكەمەسىن بولشەكتەپ، بىرنەشە كاسىپورىن قۇرادى. ال سول كەزدەگى مۇلىكتى جەكەشەلەندىرۋگە سالىنعان تىيىمعا قاراماستان ولاردى جەكەنىڭ قولىنا وتكىزىپ جىبەرەدى.

ارتىنشا بۇل كومپانيالار ا.ورماننىڭ ىقپالىنداعى زاڭدى تۇلعاعا ساتىلىپ كەتەدى. نەبارى 17 333 000 تەڭگەگە. ءسويتىپ بۇل اۋىز سۋ كومپانيالارى ا.ورماننىڭ مەنشىگىندەگى «ۆودنىە رەسۋرسى-ماركەتينگ» جشس-نە بارىپ قوسىلادى. بۇل جولى 41 027 000 تەڭگەگە باعالانعان. سوندا كەزىندە تۇتاس ءبىر قالانىڭ سۋ جۇيەسىن 17 333 000 تەڭگەگە قالاي ساتىپ جىبەرگەن دەگەن سۇراق تۋادى.

قىسقاسى بۇگىندە بۇل ج ش س قارىزعا دا بەلشەسىنەن باتقان، ءتاريفى دە ەل بويىنشا جوعارى كورىنەدى. اۋىز سۋ ساپاسى دا سىن كوتەرمەيدى.

وسىلاردى ەسكەرگەن قالا اكىمى اۋىز سۋ جۇيەسىن مەملەكەت مەنشىگىنە قايتارۋ ارقىلى تاريفتەردى جۇيەلەپ، سۋدىڭ ساپاسىن دا جاقسارتۋدى كوزدەپ وتىر. ال ەكس-اكىم دە قاراپ قالماي، كومپانيانى قالايدا قايتارماۋدىڭ قامىنا كىرىسكەن.

ع.سىزدىقبەكوۆ تە ءجانيا بوداۋدىڭ پوستىن ءبولىسىپ، ءوزى دە فەيسبۋككە جازبا قالدىردى. وندا قالا اكىمى ستراتەگيالىق نىسانداردى مەملەكەت مەنشىگىنە قايتارۋ – مەملەكەتتىك ماڭىزى بار ماسەلە ەكەننى اتاپ وتكەن.

«ءبىز بۇل جۇمىستى پرەزيدەنت تاپسىرماسى اياسىندا جۇرگىزىپ جاتىرمىز. مەنىڭ ۇستانىمىم وزگەرمەيدى: قالا ءومىرى ءۇشىن ماڭىزدى نىساندار مەملەكەتتىڭ باقىلاۋىندا بولۋى ءتيىس. بۇل باسقارۋدىڭ اشىقتىعىن قامتاماسىز ەتۋ، حالىققا قىزمەت كورسەتۋدى ۇزدىكسىز جۇرگىزۋ جانە قالا تۇرعىندارىنىڭ مۇددەسىن قورعاۋ ءۇشىن قاجەت. وسى باعىتتاعى جۇمىستى تۇرعىنداردىڭ مۇددەسىن باسشىلىققا الا وتىرىپ ءارى قاراي دا جالعاستىرامىز»، دەدى ع.سىزدىقبەكوۆ الەۋمەتتىك جەلىدە.

سونداي-اق ول قۇقىقتىق مەملەكەتتە ءومىر ءسۇرىپ جاتقاندىقتان، بۇل ماسەلەگە سوڭعى نۇكتەنى سوت قوياتىنىن جەتكىزدى.