Baiqaýdy saltanatty túrde Túrkistan oblysynyń Mádeniet jáne tilderdi damytý basqarmasy basshysynyń mindetin atqarýshy Asylhan Temirhanuly quttyqtaý sózben ashyp berdi.
Qazaqtyń mýzyka ónerinde Shámshiniń orny erekshe 300-ge jýyq áni bar. Baiqaýdyń biylǵy jetistigi uly kompozitordyń oryndalmai júrgen 15-ten asa áni jaryqqa shyǵarylyp, arnaiy aspaptardyń súiemeldeýimen kórermenge jol tartty. Olardyń qatarynda "Kel, Býrabaiǵa", "Baiqońyr", "Kelin keldi", "Kókkóldegi keshter-ai", "Egiz maqta", "Ǵashyq kúnder" jáne Abai Qunanbaevtyń sózine jazylǵan "Tyńda meni, dostarym" syndy ánder bar.
1992 jyldan beri dástúrge ainalǵan bul baiqaýdan elimizge tanymal Shakizada Baibatjanova, Qurman Shoiynbaev, Sáýle Jeldibaeva, Marat Áitimov, Nurǵali Turlybekov, Hadisha Seiitova, Jubanysh Jeksenuly, Gúljazira Qaiyrbekova, Toqtar Serikov, Asqar Júnisbekov, «Jigitter» kvarteti, Nurjan Júsipbekov, Mádihan Dúiseev, Rysdáýletovter «Órken» toby, Aibek Qanatbek, Rýslan Aqynbekov, «Saryn» toby syndy óner ieleri qanat qaqqan.
Ońtústik Qazaqstan oblysy, Otyrar aýdanynda dúniege kelgen asa kórnekti sazger, án janrynyń áigili maitalmany, Qazaqstan mádenietine eńbegi sińgen qairatker, osy zamannyń qazaq estradasynyń negizin qalaýshy, Qazaqstannyń halyq ártisi, Shymkent, Taraz, Jetisai qalalarynyń Qurmetti azamaty Shámshi Qaldaiaqov - ulttyq mýzyka óneriniń án janryna asa aiqyn, sońǵy lep ala kelgen tulǵa. Elge, jerge, Otan men ata-anaǵa degen súiispenshilik kompozitor shyǵarmalarynyń basty taqyryby bolsa, sonyń ishinde, «Meniń elim», «Ana týraly jyr», «Baqyt qushaǵynda», «Teriskei», «Arys jaǵasynda», «Otyrardaǵy toi», «Ómir-ózen» syndy kóptegen ánderi halyqtyń jattandy ómir jyryna ainalǵan.
Jeńimpazdardy marapattaý jáne Gala-kontserti keshki saǵat 19.00-de «Túrkistan saraiy» kontserttik uiymynda ótedi. Keshke QR eńbek sińirgen ártisi Qurmanbek Shoiynbaev, «Qurmet» ordeniniń iegeri, kompozitor, shámshitanýshy Qaldybek Qurmanáli, QR Mádeniet qairatkerleri Aijan Tájenova, Hadisha Shalabaeva, dástúrli ánshiler Narkenje Serikbaeva, Aqmaral Binazarova, Gúldana Maqataeva jáne «Qazyna», «Farab», «Tumar» bi ansamblderi qatysady.
Túrkistan oblystyq mádeniet jáne tilderdi damytý basqarmasynyń baspasóz qyzmeti
