Shymkentte munai ónimderin urlaý shemasy áshkerelendi, dep habarlaidy Dalanews.kz.
7 qańtarda Shymkent qalasynyń Politsiia departamenti jedel is-sharalar nátijesinde janar-jaǵarmai materialdaryn zańsyz shyǵarý arnasyn uiymdastyrǵan adamdardy ustady. Qylmystyq shemaǵa munai óńdeý zaýytymen bailanysty kásiporyndardyń biriniń qyzmetkerleri tartylyp, olar megapolis turǵyndarymen sóz bailasqan.
Urlanǵan otyndy qylmystyq shemany uiymdastyrýshylarǵa tiesili birneshe baza aýmaǵynda saqtaý jáne satý deregi anyqtalǵan. Qarajattyń kóleńkeli ainalymy 1 milliard teńgeden asady.
"Tintý kezinde iri kólemde aqsha, 17 tonnadan asa janar-jaǵarmai, otyndy saqtaý jáne aidaý quraldary, sondai-aq, birneshe avtokólik tsisternasy tárkilendi. Barlyq kúdikti ustalyp, asa iri kólemde urlyq deregi boiynsha tergeý júrgizilip jatyr. Qylmystyq is aiasynda Shymkent munai óńdeý zaýyty qyzmetkerleriniń qylmysqa, sonyń ishinde kontrabandaǵa qatysy bar-joǵy tekserilip jatyr", - dedi IIM ókili.
