QMA Shymkent qalasy boıynsha departamenti «Aýyl sharýashylyǵyn qarjylaı qoldaý qory» AQ-nyń burynǵy tóraǵasy Jandar Omarovqa qatysty sotqa deıingi tergep-tekserý júrgizýde, dep habarlaıdy Dalanews.kz.

Ol alma baqtaryn salýǵa bólingen búdjet qarajatyn ıemdený faktisi boıynsha, qyzmettik ókilettigin paıdalana otyryp, jumystar men jabdyqtardyń qunyn negizsiz kóterý jolymen urlyq jasady degen kúdikke ilindi.

Bul maqsatta ol ózimen baılanysty «Green Mart Kazakhstan» JSHS-niń basshysyn tartqan. Atalǵan tulǵa baǵdarlamaǵa qatysýshy bolyp kóriný úshin dostary men týystarynyń atyna 20 jalǵan kompanıa tirkegen.

Shyn máninde bul tulǵalar eshqandaı qyzmet atqarmaǵan jáne jobaǵa qatyspaǵan.

Jalǵan qujattar negizinde Qorǵa 1,4 mlrd teńge kóleminde lızıń alý týraly ótinimder usynylyp, olar keıin Qor tarapynan maquldanǵan.

Baıqaý rásimderin ótkizbesten, jetkizýshi retinde bir ǵana qatysýshy «Green Mart Kazakhstan» JSHS tańdalǵan.

Qarajat túsken soń, onyń bir bóligi kásiporyndardyń esepshottaryna aýdarylyp, qolma-qol aqshaǵa aınaldyrylǵan.

Sonymen qatar jabdyqtar qymbat baǵamen jetkizilgen, al jumystar oryndalmaǵan.

Nátıjesinde memleketke keltirilgen zalaldyń jalpy somasy 430 mln teńgeden asty.

AQ-nyq burynǵy tóraǵasy 2 aı merzimge qamaýǵa alyndy.

Qazirgi ýaqytta sotqa deıingi tergeý jalǵasýda.

Buǵan qosa, osy is boıynsha Qordyń burynǵy basqarýshy dırektory M.K. Iskakov pen «Green Mart Kazakhstan» JSHS basshysy R.B. Sazynbek 8 jylǵa bas bostandyǵynan aıyrylyp, 4 avtokóligi tárkilendi.

Úkim zańdy kúshine engen joq.