قما شىمكەنت قالاسى بويىنشا دەپارتامەنتى «اۋىل شارۋاشىلىعىن قارجىلاي قولداۋ قورى» اق-نىڭ بۇرىنعى ءتوراعاسى جاندار وماروۆقا قاتىستى سوتقا دەيىنگى تەرگەپ-تەكسەرۋ جۇرگىزۋدە، دەپ حابارلايدى Dalanews.kz.

ول الما باقتارىن سالۋعا بولىنگەن بيۋدجەت قاراجاتىن يەمدەنۋ فاكتىسى بويىنشا، قىزمەتتىك وكىلەتتىگىن پايدالانا وتىرىپ، جۇمىستار مەن جابدىقتاردىڭ قۇنىن نەگىزسىز كوتەرۋ جولىمەن ۇرلىق جاسادى دەگەن كۇدىككە ءىلىندى.

بۇل ماقساتتا ول وزىمەن بايلانىستى «Green Mart Kazakhstan» ءجشس-نىڭ باسشىسىن تارتقان. اتالعان تۇلعا باعدارلاماعا قاتىسۋشى بولىپ كورىنۋ ءۇشىن دوستارى مەن تۋىستارىنىڭ اتىنا 20 جالعان كومپانيا تىركەگەن.

شىن مانىندە بۇل تۇلعالار ەشقانداي قىزمەت اتقارماعان جانە جوباعا قاتىسپاعان.

جالعان قۇجاتتار نەگىزىندە قورعا 1،4 ملرد تەڭگە كولەمىندە ليزينگ الۋ تۋرالى وتىنىمدەر ۇسىنىلىپ، ولار كەيىن قور تاراپىنان ماقۇلدانعان.

بايقاۋ راسىمدەرىن وتكىزبەستەن، جەتكىزۋشى رەتىندە ءبىر عانا قاتىسۋشى «Green Mart Kazakhstan» ج ش س تاڭدالعان.

قاراجات تۇسكەن سوڭ، ونىڭ ءبىر بولىگى كاسىپورىنداردىڭ ەسەپشوتتارىنا اۋدارىلىپ، قولما-قول اقشاعا اينالدىرىلعان.

سونىمەن قاتار جابدىقتار قىمبات باعامەن جەتكىزىلگەن، ال جۇمىستار ورىندالماعان.

ناتيجەسىندە مەملەكەتكە كەلتىرىلگەن زالالدىڭ جالپى سوماسى 430 ملن تەڭگەدەن استى.

اق-نىق بۇرىنعى ءتوراعاسى 2 اي مەرزىمگە قاماۋعا الىندى.

قازىرگى ۋاقىتتا سوتقا دەيىنگى تەرگەۋ جالعاسۋدا.

بۇعان قوسا، وسى ءىس بويىنشا قوردىڭ بۇرىنعى باسقارۋشى ديرەكتورى م.ك. يسكاكوۆ پەن «Green Mart Kazakhstan» ج ش س باسشىسى ر.ب. سازىنبەك 8 جىلعا باس بوستاندىعىنان ايىرىلىپ، 4 اۆتوكولىگى تاركىلەندى.

ۇكىم زاڭدى كۇشىنە ەنگەن جوق.