Shymkentte aýdan ákiminiń qolastyndaǵylardy soqqyǵa jyqqan videosy tarady. Videony zańger Aigúl Orynbek jariialady. Onyń sózinshe, oqiǵa byltyr qazan aiynda bolǵan, dep habarlaidy Dalanews.kz.
"Maǵan kelgen kezde «Shymkent ákimi Ǵabit Syzdyqbekovke de, barlyq quzyrly organdarǵa da habarlanǵan» degen bolatyn. Qalanyń “myqty ákimi” bar emes pe, Ǵabit Syzdyqbekov zańdy túrde shara qoldanady degen úmitte boldym", - deidi zańger.
Ol bul video jýrnalisterge tarala bastaǵanyna qaraǵanda, ákimdik tarapynan eshqandai shara qabyldanbaǵan bolýy múmkin deidi.
"Videoda Shymkent qalasy Qarataý aýdanynyń ákimi óz qyzmetkerine kúsh qoldanyp, uryp-soǵyp jatqany kórinedi. Iá, qyzmetker jumysynan aiyrylyp qalmas úshin ákimge qarsy aryz jazbaýy múmkin. Biraq janyna qatty batqan adam bul videony bekerden-beker taratpaidy ǵoi. «Aigúl-aý, Shymkentte banditter órip ketti ǵoi, nege úndemei otyrsyń?» deisizder. Aidyń-kúnniń amanynda ákimdiktiń aldynda ákim orynbasaryn atyp, bir ákim óz qyzmetkerlerin uryp-soǵyp jatqanyn quzyrly organdar kórip-bilip turyp únsiz otyrsa, men ne deýim kerek?", - deidi Aigúl Orynbek.
Zańger Shymkentte qylmystyq áreketter kóbeigenin aitady.
"Bul qalaǵa Prezident aldynda jaýap beretin adam bar ǵoi. Sol jaýap bersin! Sońǵy ýaqytta Shymkentte nege qylmystyq áreketter kóbeiip ketti? Nelikten ákimdik qyzmetkerleri bir-birine oq atyp, tóbelesýge deiin baryp jatyr? Ákimdik banditterdiń ordasy emes qoi!", - deidi zańger.
