Kompanıa basshylarynyń usynystaryn tyńdap shyqqan óńir basshysy jyl saıyn halyq sany qarqyndy ósip kele jatqan qalanyń kólik qatynasyn retteýge zamanaýı tehnologıamen jabdyqtalǵan sońǵy úlgidegi qoǵamdyq kólikterdi qoldaný kerektigin jetkizdi.
– Elbasy bıylǵy halyqqa arnaǵan Joldaýynda megapolıs qalalardyń problemalaryn tıimdi sheshý úshin «Smart Sıtı» tujyrymdamasy men qalalyq ortany basqarýdyń keshendi túrin engizý qajet ekenin aıtqan bolatyn. Osy rette mıllıonǵa tarta turǵyny bar Shymkent qalasyn aqyldy qalaǵa aınaldyrý – kezek kúttirmeıtin máseleniń biri. Sonyń biri jolaýshylar tasymaldaıtyn avtobýstardy jańalaý, ıaǵnı ózderińiz aıtyp otyrǵandaı sońǵy úlgidegi tehnologıalardyń kómegimen halyqtyń júrip-turýyn jeńildetýimiz qajet, – dedi Janseıit Qanseıituly.
Shymkent qalasy ákimdiginiń bastamasymen uıymdastyrylǵan forýmǵa qatysý úshin elimizden bólek Reseı, Belorýs, Ózbekstan jáne QHR-nyń avtobýs qurastyrýshy zaýyttarynyń ókilderi arnaıy kelgen. Sharanyń maqsaty – shahardaǵy jolaýshylar tasymaldaý qyzmetiniń sapasyn arttyrý. Árbir qatysýshy ózderi óndirip otyrǵan avtobýstardyń sapasy joǵary, tıimdi baǵada ekenin jetkizdi. Olardyń aıtýynsha, qoǵamdyq kólikke ornatylǵan monıtorıń, tólem, «GPS» júıeleri men mobıldi qosymshalar jolaýshylarǵa kórsetiletin qyzmettiń sapasyn jaqsartýǵa mol múmkindik beredi.
Kezdesý sońynda oblys ákimi tıisti sala mamandaryna usynysy men baǵasy tıimdi kompanıalardy anyqtap, sol mekememen kelisimshartqa turýdy tapsyrdy. Eger kelissózder oıdaǵydaı aıaqtalsa, aǵymdaǵy jyly shymkenttikter zamanaýı quraldarmen jabdyqtarǵan sý jańa avtobýstarmen qatynaıtyn bolady.
Aıta keteıik, búginde Shymkent qalasynda jolaýshylar tasymaldaýmen aınalysatyn 26 kólik kompanıasy 70 baǵytta qyzmet kórsetedi. 1700-ge tarta avtobýstyń 70 paıyzynyń paıdalaný merzimi 7 jyldan asyp ketken.
OQO ákiminiń baspasóz qyzmeti
https://dalanews.kz/33542
