Semeı qalasyndaǵy fızıka-matematıka baǵytyndaǵy Nazarbaev Zıatkerlik mektebiniń shákirti Shyńǵys Toqanov hımıa páninen Q.Sátbaev atyndaǵy V Respýblıkalyq olımpıadanyń jeńimpazy atandy, – dep habarlaıdy Dalanews.kz.

9 synyp oqýshylary arasynda uıymdastyrylǵan bilim báıgesi bıyl Qaraǵandy qalasynda ótti. Oǵan elimizdiń ár aımaǵynan 73 úmitker qatysty. Shyńǵys olımpıada qorytyndysy boıynsha 101 upaı jınap, İ orynǵa ıe boldy.

– Olımpıada onlaın ótkizilgenimen qatań baqylandy. Talap boıynsha oqýshynyń ózi men test tapsyratyn noýtbýk ekrany tolyqtaı qadaǵalanyp otyrdy. 60 suraq berildi. Bir atap óterligi – ár suraqtyń bir nemese eki, tipten úsh jaýaby bolýy múmkin. Sondyqtan atústi qaraýǵa bolmaıdy. Ár suraqqa muqıat nazar aýdarý kerek. Osy qaǵıdalardy berik ustanǵan Shyńǵys óz bilimin dáleldeı aldy, – deıdi jetekshisi ári hımıa pániniń muǵalimi Asylbek Orazbekov.

Shyńǵys – Zıatkerlik mektepke qabyldanǵan sátten beri hımıaǵa degen qyzyǵýshylyǵyn baıqatqan. Osyny baıqaǵan ustazdar shákirtke qosymsha bilim berip, túrli daıyndyq jumystaryn júrgizip keledi. Al pán olımpıadasy shyńyn baǵyndyrý osy eńbektiń nátıjesi.