Shyǵys Qazaqstanǵa sapary aiasynda el Premer-ministriniń keńesshisi Eraly Toǵjanov oblys úshin tyń investitsiialyq jobany usynyp otyrǵan «RAM AGRO» sharýa qojalyǵynyń tynys-tirshiligimen de tanysyp qaitty, dep habarlaidy Dalanews.kz Altaynews.kz- ke silteme jasap.
Aita keteiik, búginde Ulan aýdanynyń Novo-Azovoe aýylynda «Jońyshqa ósirý maqsatynda jańbyrlatqysh qurylǵy satyp alý» jobasy júzege asyrylýda. Óńir úshin biregei jobany Madina Raimbekova qolǵa alǵan. Jobanyń biregeiligi – onyń otandyq ónim bolýynda. Iaǵni, osyǵan deiin shetelden qyrýar aqshaǵa ákelinetin qurylǵy endi Shyǵys Qazaqstanda jasalmaq. Qazir barlyq quramdas bólikteri jergilikti jerde jasalǵanymen, qurylǵynyń ózegi bolyp tabylatyn redýktor siiaqty bólshekteri syrttan alynýda. Joba avtorlary bolashaqta mundai quramdas bólshekter men elektrondy qurylǵylar Óskemende de jasalynatyn bolady dep otyr.
Bul baǵyttaǵy jumystar bastalyp ta ketken.
Eske salaiyq, «RAM AGRO» sharýa qojalyǵy «Ertis» áleýmettik-kásipkerlik korporatsiiasynyń qoldaýymen, birlesken qyzmet týraly shart jasasyp, investitsiia alýǵa qol jetkizgen. Búginde kásipker 59 paiyz, al korporatsiia 41 paiyz úlespen investitsiialyq jobany júzege asyrýda. Jobanyń jalpy quny – 636,5 million teńge.
Eraly Toǵjanov «Ertis» áleýmettik-kásipkerlik korporatsiiasynyń suranysqa ie baǵyttardy investitsiialaýǵa basymdylyq berip otyrǵanyna rizashylyǵyn bildirdi.
Jalpy, sý únemdeý máselesi men ár óńirde bolyp turatyn qýańshylyq kezeńderi aýyl sharýashylyǵy salasynda jasandy túrde jańbyrlatý tásilimen shóp ósirýdiń asa tiimdi ekendigin kórsetti. Belgili bolǵandai, mundai jańbyrlatqysh qurylǵylar kún raiyna qaramastan bir maýsymda 2-3 ret ónim alýǵa múmkindik bermek.
