Qazaqstanda jyl basynan beri janar-jaǵarmai materialdaryn zańsyz shyǵarýdyń 593 áreketiniń joly kesild, dep habarlaidy dalanews.kz.
Úkimettiń málimetinshe, bul týraly premer-ministr Oljas Bektenovtiń janar-jaǵarmai materialdary naryǵyndaǵy ahýalǵa arnalǵan keńesinde ishki ister ministri Erjan Sádenov málimdedi.
Onyń aitýynsha, avtomobil ótkizý beketterinde jalpy kólemi 40 myń litrden asatyn munai ónimderin zańsyz áketýdiń 593 áreketi anyqtalǵan. Shekara mańyndaǵy aýmaqtarda munai ónimderiniń zańsyz tasymalyn boldyrmaýǵa baǵyttalǵan jol kartasy aiasynda kúsheitilgen baqylaý jalǵasýda.
Energetika ministri Erlan Aqkenjenov eldegi janar-jaǵarmai naryǵyndaǵy jaǵdai turaqty ekenin aityp, benzin, dizel otyny jáne aviaotyn qory ishki naryqtyń suranysyn tolyq qamtamasyz etip otyrǵanyn jetkizdi.
Qarjy vitse-ministri Erjan Birjanov sońǵy eki táýlikte ótkizý beketterinde qosymsha baktar men kanistrler arqyly 3 tonnadan astam janar-jaǵarmaidy shyǵarýdyń 61 áreketi toqtatylǵanyn málimdedi. Sondai-aq 18 arnaiy avtokólik tekserilip, 34 tonna munai ónimin tasymaldaǵan bir benzin tasyǵyshtan saraptama úshin synamalar alynǵan.
Sonymen qatar memlekettik kirister organdary qyzmet kólemi qalyptan tys ósken 62 janarmai quiý stansasy men 22 shaǵyn munai óńdeý zaýytynyń qyzmetine taldaý júrgizip jatyr. Bul nysandarǵa qatysty tekserý sharalary qolǵa alynbaq.
Keńes qorytyndysy boiynsha premer-ministr Oljas Bektenov jaýapty memlekettik organdarǵa munai ónimderiniń ishki naryǵyndaǵy jaǵdaidy kún saiyn baqylaýda ustaýdy tapsyrdy.
