Reseilik bloger Ivan Chervinskiidiń Qazaqstan azamattyǵyn alýyna bailanysty áleýmettik jelide qyzý pikirtalas bastaldy, dep habarlaidy dalanews.kz.
Buǵan deiin Sankt-Peterbýrgten shyqqan bloger Ivan Chervinskii Qazaqstan Respýblikasynyń azamattyǵyn alǵanyn áleýmettik jelidegi paraqshasynda jariialaǵan bolatyn. Ol videoda Resei tólqujatyn qoiyp, Qazaqstan tólqujatyn kórsetip, «Súiinshi! Biz qazaqpyz! Alǵa, Qazaqstan!» dep jazǵan.
Osyǵan bailanysty qoǵam belsendisi Býrahan Daqanov Facebook-tegi paraqshasynda blogerdiń azamattyq alý rásiminiń zańdylyǵyn tekserýge shaqyrdy.
Belsendiniń aitýynsha, búginde kóptegen qandastar yqtiiarhatpen birneshe jyl boiy turyp, Qazaqstan azamattyǵyn ala almai júrgen kezde, elge 2023 jyly kelgen shetel azamatynyń qysqa merzimde azamattyq alýy qoǵamda suraq týǵyzady.
«Arnaiy quqyq qorǵaý organdary osy kisige azamattyq berilgen tártipti teksersin. Eger zańsyz berilgeni anyqtalsa, tiisti sheshim qabyldanýy kerek», – dep jazdy Býrahan Daqanov.
Aita keteiik, Ivan Chervinskii birneshe jyldan beri Qazaqstan týraly kontent ázirlep keledi. Ol qazaq tilin úirenip, elimizdiń mádenieti men dástúrin nasihattaityn «Alǵa, Qazaqstan» jobasynyń avtory retinde tanylǵan. Buǵan deiin bloger Qazaqstan azamattyǵyn alýdy armandaitynyn birneshe ret aitqan jáne 2023 jyly Qazaqstan halqy Assambleiasynyń sessiiasynda Prezidenttiń Alǵys hatyna ie bolǵan.
Qazirgi ýaqytta Ivan Chervinskiige Qazaqstan azamattyǵyn berý rásiminiń zańsyz bolǵany jóninde memlekettik organdar tarapynan eshqandai resmi aqparat jariialanǵan joq. Sondyqtan áleýmettik jelide aitylǵan pikirler ázirge jeke azamattardyń ustanymy bolyp sanalady.
