Sodan beri dostyq úiinde ultaralyq kelisim arta túsip, salt-dástúr, halyqtar mádenieti damydy. Eń bastysy, árbir ult ókiliniń boiynda qazaqstandyq patriotizm oiandy.
«Aq niet» vokaldyq ujymynyń qatysýshysy, musylman áielder birlestiginiń múshesi Maira Mýrsalimovanyń aitýynsha, Tuńǵysh Prezident kelgende qoldanysqa berilgen Dostyq úii ashylǵaly beri tarihi muralardyń sany artqan. Ol Elbasymen kezdesýin erekshe tolǵanyspen eske alady.
Óitkeni 1998 jyly Qazaqstan halqy Assambleiasynyń basshysy óz qolymen onyń nemeresiniń tusaýyn kesken. Qazir ol bala er jetip, elimizdiń beldi azamatyna ainaldy. Onyń ájesi bul qýanyshty oqiǵany taǵdyrdyń tartýy dep sanaidy.
ShQO QHA qoǵamdyq kelisim keńesiniń tóraǵasy, Qazaqstan halqy Assambleiasynyń múshesi Leo Shik Nursultan Nazarbaevpen kezdesýi máńgi jadynda saqtalatynyn atap aitty.
– Ult kóshbasshysynyń kelýi shyǵysqazaqstandyqtar úshin úlken mereke boldy. Ol Dostyq úiiniń ashylýynda árbir qatysýshynyń júreginen oryn taba biletin sózderdi aitty. Sóz sońynda Tuńǵysh Prezident etnos aralyq tatýlyqty saqtaýǵa úles qosqan barlyq azamattarǵa alǵysyn bildirdi, – dedi Leo Shik.
«Jańǵyrý joly» óńirlik jastar qozǵalysynyń kóshbasshysy, «Vainah» sheshen-ingýsh horeografiialyq ansambliniń kórkemdik jetekshisi Ravil Iýnýsovtyń aitýynsha, Dostyq úii onyń ómirinde úlken ról atqarady. Ol munda eń alǵash ret lezginka biin úirený úshin kelipti. Ol Nursultan Nazarbaevtyń keler aldynda, jaqsy áser qaldyrý úshin ujymmen birlesip, kóp saǵattyq daiyndyq júrgizilgenin eske alady. Qazir Ravil: «Nazarbaev maǵan Otan úshin eńbek etýdi úiretti. Ultaralyq tatýlyqty saqtaý úshin bereke men birlik kerek ekenin uǵyndyrdy» deidi.
