Ulttyq ulannyń «Shyǵys» óńirlik qolbasshylyǵynyń kinologtary arasynda kópsaiys ótti, dep habarlaidy Dalanews. kz Altainews.kz-ke silteme jasap.
«Shyǵys» óńirlik qolbasshylyǵy baspasóz qyzmetiniń jetekshisi Baǵdat Amangeldiniń aitýynsha, alty kezeńnen turatyn saiysqa 7 áskeri bólimniń eń myqty kinolog-mamandary qyzmettik izdestirý itterimen qatysyp, ózara úzdikterdi anyqtady. Dástúrge ainalǵan doda bul joly Óskemendegi túzeý mekemelerin kúzetetin 6699 áskeri bólimi aýmaǵynda uiymdastyryldy.
Óskemen, Semei, Pavlodar, Kýrchatov qalalarynan kelgen saiysqa qatysýshylar kóptegen synaqtardan súrinbei ótti. Saiys talaptary boiynsha kinolog itimen sport zalda, avtokólik pen júk kólikterinde jasyrynǵan esirtki, qarý, jarylǵysh zattardy dál tabýy tiis.
«Bul saiys kinolog mamandardyń kásibi sheberlikterin, itterdiń daiyndyǵyn anyqtaý maqsatynda ótkiziledi. Jyl saiyn biz ár oblysty tańdaimyz. Jarys bes kún bolady. Onda adamdy tintý, esirtki zattardy izdeý, jarylǵysh zattardy izdeý jáne jeke kinologtyń daiyndyǵy tekseriledi»,-deidi Ulttyq ulan «Shyǵys» óńirlik qolbasshylyǵynyń kinologiia qyzmetiniń bastyǵy Altynsary Ajybaev.
Qyzmettik itter kinologtardyń áriptesi ǵana emes ómirlik serigine ainalǵan.
«Men itimdi kishkentai kúshik kezinen asyraǵanmyn. Byltyr áskerge alyp keldik. Bul it iz kesýshi. Izdestirý boiynsha qyzmettik itter arasyndaǵy eń úzdigi. Osy joly jarysqa kelip otyrmyz. Endi kóremiz buiyrǵanyn»,-deidi Kýrchatov qalasynan kelgen 3514 áskeri bóliminiń kinology Máýlen Qaiyrbekov.
Al 3477 áskeri bóliminen kelgen Merhat Qasymhanovtyń «Shara» esimdi qyzmettik iti jarylǵysh zattardy izdeýge mashyqtanǵan. Ol osyǵan deiin birqatar saiystarǵa qatysyp, júldeli oryndarǵa ie bolǵan.
«Jarylǵysh zattardy izdeý boiynsha 27 erejeni oryndap shyqtyq. Itime óte rizamyn. Jaqsy nátije kórsetti. Bul itpen jattyqqaly tórt jyl boldy. Tórt jyl ishinde eki ret júldeli boldyq. Birinshisi Kýrchatov qalasynda jarylǵysh zattardy izdeý boiynsha saiysta jáne byltyr Pavlodar qalasynda ekinshi oryndy ielendim», -deidi Óskemendegi memlekettik mańyzdy nysandardy kúzetetin 3477 áskeri bóliminiń kinologiia qyzmeti mamandar tobynyń bólimshe bastyǵy Merhat Qasymhanov.
Saiys qorytyndysy boiynsha jalpy komandalyq esepte semeilik 5511 áskeri bóliminiń kinolog mamandary birinshi oryndy ielense, ekinshi oryndy Kýrchatov qalasynan kelgen 3514 áskeri bóliminiń kinologtary, al Óskemendik 5518 áskeri bóliminiń kinologtary júldeli úshinshi oryndy jeńip aldy.
