ۇلتتىق ۇلاننىڭ «شىعىس» وڭىرلىك قولباسشىلىعىنىڭ كينولوگتارى اراسىندا كوپسايىس ءوتتى، دەپ حابارلايدى Dalanews. kz Altainews.kz-كە سىلتەمە جاساپ.
«شىعىس» وڭىرلىك قولباسشىلىعى باسپا ءسوز قىزمەتىنىڭ جەتەكشىسى باعدات امانگەلدىنىڭ ايتۋىنشا، التى كەزەڭنەن تۇراتىن سايىسقا 7 اسكەري ءبولىمنىڭ ەڭ مىقتى كينولوگ-ماماندارى قىزمەتتىك ىزدەستىرۋ يتتەرىمەن قاتىسىپ، ءوزارا ۇزدىكتەردى انىقتادى. داستۇرگە اينالعان دودا بۇل جولى وسكەمەندەگى تۇزەۋ مەكەمەلەرىن كۇزەتەتىن 6699 اسكەري ءبولىمى اۋماعىندا ۇيىمداستىرىلدى.
وسكەمەن، سەمەي، پاۆلودار، كۋرچاتوۆ قالالارىنان كەلگەن سايىسقا قاتىسۋشىلار كوپتەگەن سىناقتاردان سۇرىنبەي ءوتتى. سايىس تالاپتارى بويىنشا كينولوگ يتىمەن سپورت زالدا، اۆتوكولىك پەن جۇك كولىكتەرىندە جاسىرىنعان ەسىرتكى، قارۋ، جارىلعىش زاتتاردى ءدال تابۋى ءتيىس.
«بۇل سايىس كينولوگ مامانداردىڭ كاسىبي شەبەرلىكتەرىن، يتتەردىڭ دايىندىعىن انىقتاۋ ماقساتىندا وتكىزىلەدى. جىل سايىن ءبىز ءار وبلىستى تاڭدايمىز. جارىس بەس كۇن بولادى. وندا ادامدى ءتىنتۋ، ەسىرتكى زاتتاردى ىزدەۋ، جارىلعىش زاتتاردى ىزدەۋ جانە جەكە كينولوگتىڭ دايىندىعى تەكسەرىلەدى»،-دەيدى ۇلتتىق ۇلان «شىعىس» وڭىرلىك قولباسشىلىعىنىڭ كينولوگيا قىزمەتىنىڭ باستىعى التىنسارى اجىبايەۆ.
قىزمەتتىك يتتەر كينولوگتاردىڭ ارىپتەسى عانا ەمەس ومىرلىك سەرىگىنە اينالعان.
«مەن ءيتىمدى كىشكەنتاي كۇشىك كەزىنەن اسىراعانمىن. بىلتىر اسكەرگە الىپ كەلدىك. بۇل يت ءىز كەسۋشى. ىزدەستىرۋ بويىنشا قىزمەتتىك يتتەر اراسىنداعى ەڭ ۇزدىگى. وسى جولى جارىسقا كەلىپ وتىرمىز. ەندى كورەمىز بۇيىرعانىن»،-دەيدى كۋرچاتوۆ قالاسىنان كەلگەن 3514 اسكەري ءبولىمىنىڭ كينولوگى ماۋلەن قايىربەكوۆ.
ال 3477 اسكەري بولىمىنەن كەلگەن مەرحات قاسىمحانوۆتىڭ «شارا» ەسىمدى قىزمەتتىك ءيتى جارىلعىش زاتتاردى ىزدەۋگە ماشىقتانعان. ول وسىعان دەيىن ءبىرقاتار سايىستارعا قاتىسىپ، جۇلدەلى ورىندارعا يە بولعان.
«جارىلعىش زاتتاردى ىزدەۋ بويىنشا 27 ەرەجەنى ورىنداپ شىقتىق. يتىمە وتە ريزامىن. جاقسى ناتيجە كورسەتتى. بۇل يتپەن جاتتىققالى ءتورت جىل بولدى. ءتورت جىل ىشىندە ەكى رەت جۇلدەلى بولدىق. ءبىرىنشىسى كۋرچاتوۆ قالاسىندا جارىلعىش زاتتاردى ىزدەۋ بويىنشا سايىستا جانە بىلتىر پاۆلودار قالاسىندا ەكىنشى ورىندى يەلەندىم»، -دەيدى وسكەمەندەگى مەملەكەتتىك ماڭىزدى نىسانداردى كۇزەتەتىن 3477 اسكەري ءبولىمىنىڭ كينولوگيا قىزمەتى ماماندار توبىنىڭ بولىمشە باستىعى مەرحات قاسىمحانوۆ.
سايىس قورىتىندىسى بويىنشا جالپى كوماندالىق ەسەپتە سەمەيلىك 5511 اسكەري ءبولىمىنىڭ كينولوگ ماماندارى ءبىرىنشى ورىندى يەلەنسە، ەكىنشى ورىندى كۋرچاتوۆ قالاسىنان كەلگەن 3514 اسكەري ءبولىمىنىڭ كينولوگتارى، ال وسكەمەندىك 5518 اسكەري ءبولىمىنىڭ كينولوگتارى جۇلدەلى ءۇشىنشى ورىندى جەڭىپ الدى.
