Volonterlar jyly aiasynda eriktilerge memleket tarapynan erekshe qoldaý kórsetildi. Belsendi jastar da qarap qalmai, «Bilim», «Sabaqtastyq», «Saýlyq», «Taza álem», «Asyl mura», «Qamqor», «Úmit» baǵyttaryna negizdelgen óńirlik jol kartasy aiasynda túrli áleýmettik jobalardy iske asyrdy.
Máselen, 113 volonter aýyldyq jerlerdegi mektep túlekterin UBT-ǵa daiyndaýǵa, aǵylshyn tilin, kompiýterlik saýattylyqtaryn arttyrýǵa atsalysty. Al, «Qamqor» baǵytynda 1500-ǵa jýyq azamat 348 is-shara ótkizgen. Óńir eriktileri tótenshe jaǵdai kezinde provizorlyq statsionarlardaǵy dárigerlerge de kómek kórsetti. «Jylý syila», «Jaqsy kórshiler», «Men úidemin», «Úide bol» degen siiaqty túrli aktsiialar uiymdastyryp, halyqqa erekshe qoldaý bildirdi.
– Ótken jyly naýryzda eriktilerdiń Aimaqtyq front-ofisi qurylyp, qalalar men aýdandardaǵy volonterlik toptardyń jumysy joǵary dárejede úilestirildi. Erekshe atap ótetin jait, tótenshe jaǵdai jáne shekteý sharalary kezinde 7 myńǵa jýyq volonter jumyldyryldy. Olar 313 myńǵa jýyq maska taratý aktsiialaryn ótkizip, 14 tonnadan astam gýmanitarlyq júk túsirýge járdemdesti. «Biz birgemiz!» aktsiiasy aiasynda kópbalaly jáne az qamtylǵan otbasylarǵa, jalǵyz basty qart adamdarǵa arnalǵan 31 myńnan astam azyq-túlik sebetterin jetkizdi, – dedi ShQO oblystyq ishki saiasat basqarmasynyń basshysy Azamat Muhamedchinov.
– Elimizde koronavirýs indeti áli basylǵan joq. Sondyqtan byltyrǵy ádis-tásilderdi qoldana otyryp, volonterler jumysyn jalǵastyrý kerek. Kelesi másele, oqýshylardyń onlain formatta oqýy. Bul bilim salasyndaǵy kúrdeli másele. Sondyqtan osynaý qiyn-qystaý kezeńde volonterlar oqýshylar men stýdentterge kómek qolyn sozýy qajet. Oblystyq bilim basqarmasymen birigip, bul máseleni sheshýdi tapsyramyn. Volonterlik qozǵalysty baǵyttarǵa bólmei, naqty máselelerdi sheshýge jumyldyryńyzdar, - dedi Danial Ahmetov.
Oblys basshysy Danial Ahmetovtiń aitýynsha, biylǵy jyly oblysta volonterlar qozǵalysy densaýlyq saqtaý, bilim jáne áleýmettik qorǵaý basqarmalarymen etene jaqyn jumys isteýi kerek. Sondai-aq, Táýelsizdiktiń 30 jyldyq mereitoiyna daiyndyqty qazirden bastaýdy tapsyrdy.
Aita keteiik, búgingi kúni oblysta barlyǵy 159 volonterlik uiym jáne toptar jumys isteidi. Jalpy volonterler sany 31 817 adamdy quraidy.
ShQO ákiminiń baspasóz qyzmeti
