Úkimet basshysy Asqar Mamın óńirge jasaǵan jumys sapary barysynda Altaı aýdanyndaǵy Turǵysyn ózeninde salynyp jatqan SES-te kórip, qurylys jumystarynyń barysymen tanysty. Búginde qurylys jumystary aıaqtalýǵa taıaý. Ústimizdegi jyldyń qyrkúıek aıynda iske qosylatyn stansıanyń qýattylyǵy 29,4 MVt quraıdy.
Mamandardyń pikirinshe, Turǵysyn ózeninde osy ispettes taǵy úsh stansıa salý josparlanǵan. SES-tiń sý jınatyn bógetiniń uzyndyǵy 284 metrdi quraıdy. Munda qýat kózin óndirý úshin 6 mıllıon tekshe metr sý qoryn jınaqtaýǵa bolady. Osy rette jańa nysan Shyǵystyń 40 gradýstyq sary aıazy men kóktemgi sý tasqynyna tótep beretinimen erekshelenedi.
Premer-Mınıstr Eýropa men Amerıkadaǵy ozyq tehnologıanyń negizinde salynyp jatqan nysanǵa gıdroenergetıkalyq qondyrǵylardyń qalaı ornatylyp jatqanyn óz kózimen kórdi.
Jalpy, stansıada qýat kózin óndiretin úsh qondyrǵy bolady Onyń ekeýi 11,5 MVt bolsa, úshinshisi 1 MVt quraıdy. Zamnaýı qondyrǵylar qatty aıazda, taý ózender muz qursaǵanda da jumys isteı beredi. Aıta ketýimiz kerek, sý elektr stansıalary iske qosylǵannan keıin ol birden Qazaqstannyń birtutas energetıkalyq júıesine qosylyp, qashyqtan basqarý júıesinde jumys isteıdi.
Asqar Mamın oblysta shaǵyn ózenderdiń potensıalyn tıimdi paıdalanyp, elektr energıasyn óndirý salasyna oń baǵasyn berdi.
